Pesëvjeçarit ia largojnë me sukses farën e lulediellit që ia kishte bllokuar rrugët kryesore të frymëmarrjes

Në Klinikën e Otorinolaringologjisë të Qendrës Klinike dhe Universitare të Kosovës është shpëtuar me sukses jeta e një fëmijës 5-vjeçar, i cili kishte aspiruar një farë të paqëruar luledielli që kishte bllokuar rrugët kryesore të frymëmarrjes, njofton Shërbimi Spitalor Klinik dhe Universitar i Kosovës.

Falë reagimit të shpejtë të ekipit kujdestar të ORL-së, i udhëhequr nga dr. Flamur Ukaj, otorinolaringolog, dhe bashkëpunimit të menjëhershëm me ekipin kujdestar të Anesteziologjisë , nga dr. Valmir Idrizi, u realizua me sukses ndërhyrja urgjente (trakobronkoskopi rigjid), me ç’rast u largua trupi i huaj dhe u shpëtua jeta e fëmijës.

Në ekip morën pjesë edhe instrumentarja e sallës së ORL-së dhe specializantët nga ORL dhe Anrsteziologjia.

Fëmija është në gjendje stabile dhe është lëshuar në shtëpi pa komplikime.

QKUK, apelon tek të gjithë prindërit që të kenë kujdes të shtuar ndaj fëmijëve të vegjël, duke shmangur kontaktin me trupa të huaj si fara, kikirikë, pjesë të vogla lodrash etj., pasi mund të paraqesin rrezik serioz për jetën e tyre, njofton Shërbimi Spitalor Klinik dhe Universitar i Kosovës.  /2LONLINE/