Përvjetori i Konventës për të Drejtat e Fëmijëve
Në Komunën e Kamenicës u shënua Dita Ndërkombëtare e Konventës për të Drejtat e Fëmijëve, një datë e rëndësishme që kujton angazhimin global për mbrojtjen, respektimin dhe promovimin e të drejtave të fëmijëve.
Me këtë rast, nxënësit e klasave të V-ta të SHFMU “Fan S. Noli”, në Kamenicë, të shoqëruar nga mësueset Arbenita Dervishi dhe Shpresa Ajvazi, vizituan komunën ku u mirëpritën nga:
- Drejtori i Arsimit, Afrim Dervishi
- Koordinatorja e NJKDNJ-së, Nazmije Demolli-Kastrati
- Zyrtarja për Barazi Gjinore, Kosovare Maroca Berisha
- Sabit Zylfijaj dhe Fjolla Veseli nga DKA.
Qëllimi i kësaj dite ishte njohja e nxënësve me rëndësinë e Konventës për të Drejtat e Fëmijëve dhe kuptimi i rolit të institucioneve komunale në mbrojtjen dhe avancimin e këtyre të drejtave.
Drejtori i Arsimit, Afrim Dervishi, theksoi rëndësinë e edukimit mbi të drejtat e fëmijëve, duke nënvizuar se “shkolla dhe institucionet komunale janë partnerë të rëndësishëm në krijimin e një mjedisi të sigurt ku çdo fëmijë gëzon të drejtat dhe mbështetjen e nevojshme”.
Ndërkaq, Koordinatorja e NJKDNJ-së, Nazmije Demolli-Kastrati, mbajti një ligjëratë me temën: “Të drejtat dhe detyrat e fëmijëve sipas Konventës për të Drejtat e Fëmijëve”, ku fëmijët u përfshinë në një diskutim interaktiv. Ajo theksoi se çdo fëmijë ka jo vetëm të drejta, por edhe detyra brenda familjes, shkollës dhe komunitetit.
Ajo u rikujtoi nxënësve se:
• E drejta për arsim,
• Mbrojtja nga dhuna dhe diskriminimi,
• E drejta për pjesëmarrje,janë shtylla të rëndësishme të Konventës.
Ky aktivitet vjen në vazhdën e angazhimit të Njësisë Komunale për të Drejtat e Njeriut në bashkëpunim me Drejtorinë e Arsimit për të promovuar kulturën e respektimit të të drejtave të fëmijëve dhe për të krijuar një mjedis të sigurt e gjithëpërfshirës për ta. /2LONLINE/