Përurohet stadiumi “Adem Jashari” pas kryerjes së punimeve në renovimin e tij.

Kryeministri i Republikës së Kosovës, Hashim Thaçi, së bashku me ministrin e sportit, Memli Krasniqi dhe kryetarin e Federatës së Futbollit të Kosovës, Fadil Vokrri, sot në mesditë, e kanë përuruar stadiumin “Adem Jashari” në Mitrovicë, pas kryerjes së punimeve në renovimin e tij.

Përurimi u bë vetëm dy ditë para ndeshjes miqësore historike që Përfaqësuesja e Kosovës do ta zhvillojë kundër Haitit. Kryeministri Thaçi është shprehur i mahnitur me punimet që janë bërë në rinovimin e tërësishëm të stadiumit, për të qenë i gatshëm për ndeshjen e parë ndërkombëtare të Përfaqësueses së Kosovës. Ai pasi e preu shiritin, vizitoi të pjesë të ndryshme të stadiumit dhe u nda i kënaqur me punën e bërë, transmeton RTK.

I kënaqur me punimet është shprehur edhe Fadil Vokrri. Ai  ka falënderuar kryeministrin dhe ministrin për investimet që kanë bërë dhe u ka bërë thirrje që të vazhdojnë me investime edhe në stadiumet tjera.

Ndërkohë, ministri i sportit, Memli Krasniqi, ka paralajmëruar se shumë shpejt edhe stadiumi në kryeqytet do të rinovohet dhe do të jetë i gatshëm për ndeshje ndërkombëtare.