Përurohet objekti i ri shkollor në fshatin Ballancë

/2L ONLINE/ – Në Ballancë të Vitisë në prani të përfaqësuesve të Institucioneve Komunale, personelit arsimor, nxënësve dhe mysafirë të tjerë u bë përurimi i objektit të ri shkollor i ndërtuar me mjete vetanake të Komunës së Vitisë. Për ndryshe nxënësit e kësaj shkolle me parë i kanë vijuar mësimit në një objekt të vjetruar dhe me kushte të vështira.

Kryetari i Komunës së Vitisë, Sokol Haliti në ceremoninë e përurimit të këtij objekti shkollor ndër tjerash tha se qeveria komunale e Vitisë ka prioritet rritjen e cilësisë dhe krijimin e kushteve për mësimdhënie dhe mësim nxënie, me qëllim që gjeneratat e reja të cilat vijnë të jenë të aftë të konkurrojnë me gjenerata e shteteve evropiane.

Ndërkaq Qahil Sinani, Drejtor për Arsim tha se me ndërtimin e këtij objekti u bë e mundur që nxënësit e fshatit Ballancë të vijojnë mësimin me një ndërrim ashtu siç e zhvillojnë mësimin edhe shumë shkollë të tjera të kësaj komune.

“Me krijimin e hapësirës së mjaftueshme në këtë shkollë si dhe angazhimin e strukturave arsimore e shkollore do të ndikojnë në përmirësimin e sukseseve të nxënësve në procesin e dijes” u shpreh Drejtori Sinani.

Ndërkaq Drejtori i kësaj shkolle që mbanë emrin e dëshmorit “ Safet Rexhepi” pasi falënderoj institucionet komunale për ndërtimin e objektit të ri ka folur edhe për historikun e kësaj shkolle. Përndryshe edhe nxënësit e fshatit Ballancë më pare kanë zhvilluar mësimit në një objekt të vjetër me kushte shumë të vështira./2L ONLINE/