Në Roganë të Kamenicës u mbajt ceremonia e zbulimit të busteve

Përurohen bustet e heronjve Metush Krasniqi e Sejdi Kryeziu

18.04.2026 - 21:23 1 minutë lexim

Sot në Roganë të Kamenicës u mbajt me dinjitet të lartë ceremonia e zbulimit të busteve të heronjve Metush Krasniqi dhe Sejdi Kryeziu, në nderim të jetës dhe veprës së tyre në shërbim të lirisë dhe atdheut

Ceremonia u zhvillua në një atmosferë solemne, e shoqëruar me fjalime rasti nga përfaqësues institucionalë dhe familjarë. Të pranishmëve iu drejtuan me mesazhe përkujtimore dhe frymëzuese znj. Arta Bajralija, Nënkryetare e Komunës, z. Shefik Sadiku, Kryetar i Shoqatës së Ish të Burgosurve Politikë, si dhe znj. Teuta Krasniqi dhe znj. Emira Kryeziu, të cilat ndanë kujtime dhe vlerësime për figurat e nderuara.

Programi artistik i realizuar nga nxënësit e shkollave tona, me interpretimin e këngës “Pa bashkim nuk ka fuqi” dhe recitimin “Jam Shqiptar e Kosovar”, i dha ceremonisë një dimension të veçantë emocional dhe edukativ.

Në përmbyllje të aktivitetit u bë zbulimi i busteve, si dhe vendosja e kurorave me lule në shenjë nderimi dhe mirënjohjeje të përhershme. /2LONLINE/