Përmbyllen aktivitetet e Kamenica Summer Fest 2026
Mbrëmë, në Amfiteatrin e Lugut të Verdhë, u mbajt “Darka e Kryetarit me Qytetarë”, një mbrëmje e veçantë që shënoi përmbylljen e aktiviteteve të shumta të Kamenica Summer Fest 2026.
“Darka u karakterizua nga ushqimet tradicionale vendore, atmosfera e ngrohtë dhe momentet e bukura të kaluara së bashku me qytetarët”, thuhet në njoftimin e Komunës së Kamenicës.
Me këtë rast, kryetari i Komunës së Kamenicës, Kadri Rahimaj falënderoi të gjithë qytetarët për pjesëmarrjen në darkën e mbrëmshme, si dhe për pjesëmarrjen gjatë gjithë organizimit të Kamenica Summer Fest 2026.
“Një falënderim i veçantë shkon për të gjithë ata që kontribuuan në realizimin e këtij festivali dhe që, me praninë dhe mbështetjen e tyre, e bënë Kamenicën edhe më të gjallë gjatë këtyre ditëve”, tha Rahimaj.
Ai shtoi se kjo darkë ishte një mundësi e mirë për të bashkëbiseduar, për të ndarë kujtime nga ditët e festivalit dhe për të festuar së bashku një verë të mbushur me muzikë, sport, kulturë dhe aktivitete për të gjitha moshat. /2LONLINE/