Përmbushi premtimin dhënë gjyshes

Shqiptarja nga Turqia, përmbush premtimin dhënë gjyshes, gjen kushërinjtë e saj në Gjilan Vajza 25 vjeçare, Ezgi Ilbaş nga qyteti i Bursas së Turqisë ka gjetur kushërinjtë e saj në Gjilan, pasi stërgjyshërit e saj 85 vjet më parë ishin shpërngulur në Turqi.

Gjyshja e Ezgi Ilbaş, Sanija, para 85 vjetësh, kur ishte vetëm një vjeçare, së bashku me prindërit e saj ishte shpërngulur në Turqi dhe ishin vendosur në Bursa, dhe që nga atëherë nuk kishin ardhur asnjëherë në Kosovë.

Takimi i saj me kushërinjtë ndodhi pasi Ezgi, e cila gjithmonë e ka konsideruar veten shqiptare, kishte ardhur nga Turqia për t’i kërkuar kushërinjtë, meqë i kishte premtuar gjyshes së saj që do të mundohet ta gjejë familjen e saj.

“E kam pyetur gjyshen se a dëshiron t’i vizitojë trojet ku ke lindur, ndërsa ajo mu ka përgjigjur: sigurisht se po, vetëm se e dimë se ku i kemi të afërmit, pasi për herë të fundit jemi dëgjuar para 40 vjetësh”, tha Ezgi për  ‘G-Lan City’.

Me të ardhur në Gjilan, Egzi kishte kontaktuar administratorët e faqes “G-Lan City” të cilët e ndihmuan në gjetjen e kushërinjve të saj të cilët i kërkonte.

Pas prezantimit te kushërinjtë, përkatësisht te Faik Dërvodeli të kushërirës së tij dhe pas shpjegimit të vajzës dhe përkthimit nga administratorët e ‘G-Lan City’, ata kuptuan që me të vërtetë ishin kushërinj.

Të dyja palët, si familja e Faik Dërvodelit, ashtu edhe Egzi Ilbaş ishin shumë të lumtur për këtë ndodhi që u ndodhi atyre, meqë nuk kishin kontaktuar qysh nga viti 1974, kur babai i Faikut, Rexhepi kishte vizituar kusherinjtë në Turqi.