Përkujtohen dëshmorët Shaban e Sami Ukshini

/2L ONLINE/ – Në 15 vjetorin e rënies, përkujtohen dëshmorët e kombit, Shaban e Sami Ukshini. Ata, nën emblemën e UÇPMB-së, duke luftuar për të drejtat dhe lirinë e shqiptarëve të Kosovës Lindore, në zonën operative të Preshevës, ranë heroikisht në Rahovicë, më 14 maj 2001.

Në shenjë nderimi për ta, Këshilli i Bashkësisë Vendore në Zhegër dhe Shoqatat kulturore – humanitare “Kurexhaj”, sot organizuan homazhe për këta dëshmorë, në Varrezat e Dëshmorëve në Gjilan, ku morën pjesë dhjetëra e dhjetëra qytetarë si dhe bashkëluftëtarë të Shabanit e Samiut, ku edhe u vendosën kurora lulesh nga institucionet komunale dhe shoqatat e veteranëve të luftës si dhe organizatorët.

Më pas, përmes një akademie përkujtimore, në hapësirat e shkollës së mesme të ulët “Agim Ramadani” në Zhegër, për shëmbëlltyrën e këtyre dy trimave, foli veterani i arsimit të kësaj ane, Bilall Haliti. Në emër të institucioneve komunale dhe të kryetarit të komunës, me një fjalë u paraqit edhe Abdyl Aliu, shef i këshilltarëve komunal të LDK-së. Ndërsa në emër të veteranëve të luftës, për heroizmin e Shabanit e të Samiut, foli ish komandanti i kësaj Zone , Mustafë Shaqiri. /2L ONLINE/