Përkujtohen Arben Xeladini dhe Mon Balaj

Janë përkujtuar Arben Xeladini e Mon Balaj, në 8 vjetorin e vrasjes së tyre gjatë protestës së organizuara nga Lëvizja Vetëvendosje, kundër pakos së Ahtisarit.

Lideri i VV-së, Albin Kurti, bashkëpartiakët e tij Visar Ymeri e Shpend Ahmeti, si dhe familjarë të të vrarëve kanë vënë lule tek pllakata e vendosur në Sheshin ‘Nënë Tereza’, në kryeqytet, aty ku ishin qëlluar të ndjerët me plumba gome nga policia rumune në vitin 2007.

Albin Kurti lideri i Vetëvendosjes ka thënë se ishin mbledhur pikërisht në këtë vend, për të kujtuar momentin e vrasjes së dy aktivistëve më të dinjitetshëm që ranë heroikisht për Kosovën tonë.

“Jemi mbledhur këtu për ta kujtuar Monin dhe Arbenin të cilët u vranë nga Policia e UNMIK-ut, (rumunë)në mënyrë që të mos e harrojmë kurrë gjakun e tyre, dhe për të mos i harruar kurrë emrat e tyre, që do të mbetën si gjurmë të pashlyera edhe në brezat që do vijnë”, tha Kurti.