Përfundojnë aktivitetet e Javës Botërore të Gjidhënies

Qendra Kryesore e Mjekësisë Familjare (QKMF), në Gjilan ka përmbyllur aktivitetet e organizuara në kuadër të Javës Botërore të Gjidhënies, të mbajtura nga 03 deri më 07 gusht 2026, nën moton: “Ushqyerja me gji për një fillim të qëndrueshëm në jetë – Forconi atë që funksionon.”

Gjatë gjithë javës, në QKMF – Gjilan dhe në Qendrat e Mjekësisë Familjare janë zhvilluar aktivitete këshilluese dhe edukative për gratë shtatzëna, nënat gjidhënëse dhe gratë e tjera të interesuara.

Java është përmbyllur më 07 gusht, me një aktivitet edukativ në grup në QKMF – Gjilan, ku pjesëmarrëset patën mundësi të diskutojnë, të parashtrojnë pyetje dhe të marrin këshilla profesionale lidhur me gjidhënien dhe kujdesin për foshnjën.

Në aktivitetet e organizuara morën pjesë 20 gra, përfshirë gra shtatzëna, nëna gjidhënëse dhe gra të interesuara.

Gjatë aktiviteteve u theksua rëndësia e gjidhënies ekskluzive gjatë gjashtë muajve të parë të jetës së foshnjës, përfitimet e qumështit të gjirit për rritjen dhe zhvillimin e shëndetshëm, si dhe roli i tij në mbështetjen e sistemit imunitar dhe mbrojtjen e shëndetit të foshnjës.

“Pjesëmarrëset i vlerësuan pozitivisht aktivitetet, veçanërisht këshillat praktike, komunikimin e drejtpërdrejtë me personelin shëndetësor dhe mundësinë për të marrë përgjigje profesionale për pyetjet dhe shqetësimet e tyre”, thuhet në njoftimi ne QKMF-së.

Këshillimi dhe mbështetja profesionale gjatë kësaj jave u ofruan nga infermieret Sebahate Haziri dhe Luljeta Qorrolli, në bashkëpunim me personelin shëndetësor të QKMF-së dhe QMF-ve.

“QKMF – Gjilan do të vazhdojë me aktivitetet e edukimit dhe promovimit shëndetësor, duke fuqizuar mbështetjen për nënat dhe familjet dhe duke kontribuar në shëndetin dhe mirëqenien e nënës dhe fëmijës. Mbështetja e sotme, shëndeti i nesërm!”, thuhet në fund të njoftimit.   /2LONLINE/