Përfundoi procesi i buxhetimit me pjesëmarrje në Komunën e Gjilanit

Ka përfunduar buxhetimi me pjesëmarrje, “Merr pjesë, vendos”, nismë e filluar vitin e kaluar si praktikë e mirë nga Aktiviteti Kontrata Sociale në bashkëpunim me USAID-in.

Projekti është realizuar në shtatë lokalitete.

Pas organizimit të dëgjimeve publike dhe marrjes së propozimeve nga qytetarë, është vazhduar me fazën e votimit të propozimeve për projekte.

Buxhetimin me pjesëmarrje ka vazhduar këtë vit me Malishevën, Livoçin e Ulët, Velekincën, Kravaricën dhe tre grupet e komuniteteve jo shumicë.

280 mijë euro do të shpenzohen për realizimi e këtyre projekteve.

“Buxhetimi me pjesëmarrje, si forma më demokratike dhe proaktive e buxhetimit siguron mundësinë që qytetarët të marrin rol aktiv dhe të përfshihen në vendimmarrjen komunale duke vendosur përmes votimit të tyre të drejtpërdrejtë për projektet e propozuara nga vetë ata”, tha Drejtoresha për Buxhet dhe Financa, Herolinda Murati-Leka.

Më shumë fonde dhe më shumë lokalitete e grupe ishin të përfshira këtë vit tha ajo dhe tregoi se 150 pjesëmarrës ishin në takimet e para të dhënies së propozimeve në buxhetimin me pjesëmarrje.

Ndërsa 209 pjesëmarrës ishin në takimet e dyta, gjegjësisht në takimet ku janë votuar projektet fituese.

Numri total i pjesëmarrësve në dy takimet ne Buxhetimin me pjesëmarrje ishte 359. /2LONLINE/