Përfaqësuesit e UKZ-së  zhvillojnë takim me profesorin Miroslav Mareš në Masaryk University për thellimin e bashkëpunimit akademik

Gjatë pjesëmarrjes në Infosesion-in e organizuar në Brno të Republikës Çeke, delegacioni i Universitetit Publik “Kadri Zeka” i përbërë nga nga Rektori, Prof. Assoc. Dr. Artan Dërmaku, Prorektori për Bashkëpunim Ndërkombëtar dhe Projekte, Prof. Dr. Dukagjin Leka, Dekani i Fakultetit të Shkencave Sociale, Prof. Assoc. Dr. Selim Daku, si dhe Drejtori për Buxhet dhe Financa, z. Valon Kllokoqi, ka realizuar një takim me prof. Miroslav Mareš nga Fakulteti i Shkencave Sociale në Masaryk University.

Në këtë takim u diskutuan mundësitë për thellimin e bashkëpunimit ndërmjet UKZ-së dhe Masaryk University, me theks të veçantë në zhvillimin e programeve të përbashkëta studimore dhe iniciativave të mobilitetit përmes projekteve ndërkombëtare. Palët vlerësuan mundësinë e krijimit të një programi të dedikuar mobiliteti për stafin dhe studentët e Fakulteteve të Shkencave Sociale, si një hap i rëndësishëm drejt rritjes së shkëmbimeve akademike ndërinstitucionale.

Po ashtu, u trajtuan perspektivat e bashkëpunimit në projekte të përbashkëta ndërkombëtare, veçanërisht në programet që synojnë forcimin e kapaciteteve institucionale dhe zhvillimin akademik e shkencor. U theksua rëndësia e përfshirjes së Masaryk University në nisma kyçe të UKZ-së, përfshirë Universitetin Veror dhe Konferencën Vjetore Shkencore të institucionit tonë, të cilat paraqesin platforma të rëndësishme për dialog shkencor dhe shkëmbim profesional.

Prof. Miroslav Mareš u vlerësua si një urë e rëndësishme lidhëse ndërmjet Masaryk University dhe UKZ-së, duke kontribuar në fuqizimin dhe avancimin e formave të bashkëpunimit akademik, kërkimor dhe ndërkombëtar.

Ky takim plotëson angazhimet e delegacionit të UKZ-së në Infosession, ngjarje që ka mbledhur përfaqësues të universiteteve nga Evropa, Azia, Afrika dhe Amerika, ku synimi kryesor është krijimi i partneriteteve të reja dhe zhvillimi i projekteve të përbashkëta në kuadër të programeve ERASMUS+. /2LONLINE/