Përfaqësues të UKZ-së morën pjesë në aktivitetin “Pilot Testing 1” të projektit EMPHASIS në Greqi

Në kuadër të projektit EMPHASIS, përfaqësues të Universitetit Publik “Kadri Zeka” morën pjesë në aktivitetin “Pilot Testing 1”, i cili u mbajt në Kozani të Greqisë. Aktiviteti mblodhi partnerët e projektit me qëllim të prezantimit të programit të trajnimit, moduleve edukative dhe testimit të platformës EMPHASIS, me fokus në zhvillimin e kompetencave dhe promovimin e praktikave inovative në arsimin e lartë.

Gjatë aktivitetit, U.D. Udhëheqësi i Zyrës për Bashkëpunim Ndërkombëtar dhe Anëtarësime, z. Betim Berisha, prezantoi Universitetin Publik “Kadri Zeka”, si dhe aktivitetet dhe progresin e arritur nga universiteti në kuadër të projektit EMPHASIS. Pjesë e trajnimit ishin edhe profesorët Teuta Agaj dhe Berat Dërmaku, si dhe zyrtarët Lizë Maliqi dhe Burim Ademi.

Takimi kishte për qëllim shkëmbimin e përvojave ndërmjet partnerëve, vlerësimin e rezultateve të deritanishme dhe diskutimin e hapave të ardhshëm për qëndrueshmërinë dhe shfrytëzimin e rezultateve të projektit.

Në kuadër të aktivitetit, pjesëmarrësit vizituan edhe qendrën kërkimore CERTH/EKETA në Ptolemaida, ku u njohën nga afër me iniciativa dhe praktika të avancuara në fushën e tranzicionit të gjelbër, teknologjive të qëndrueshme dhe inovacionit. Kjo vizitë ofroi një mundësi të vlefshme për shkëmbim njohurish dhe për të parë nga afër zgjidhje inovative që kontribuojnë në zhvillimin e qëndrueshëm.

Projekti EMPHASIS vazhdon të kontribuojë në modernizimin e arsimit të lartë, duke promovuar qasje të reja në mësimnxënie, zhvillim profesional dhe bashkëpunim ndërkombëtar, me synim përmirësimin e cilësisë së arsimit dhe forcimin e kapaciteteve institucionale. /2LONLINE/