Pensionohet mësimdhënësi Nehat Ramadani

Pas më shumë se katër dekadash kontribut të pandërprerë në arsim, është pensionuar mësimdhënësi i Gjuhës Shqipe, Nehat Ramadanit, për të mbetur një shembull i rrallë i përkushtimit, sakrificës dhe dashurisë për dijen dhe arsimin shqip.

Përmes një rrugëtimi të gjatë profesional,  të nisur në shtator të vitit 1986, Nehat Ramadani la gjurmë të pashlyera në edukimin e gjeneratave të shumta, duke u bërë një udhërrëfyes i vërtetë për nxënësit e tij.

Veçanërisht sfiduese ishin vitet e ’90-ta, kur arsimi në Kosovë përballej me kushte të rënda materiale dhe presion të vazhdueshëm nga regjimi serb. Në një kohë kur shumë mësimdhënës u detyruan të largoheshin nga profesioni apo vendi, Ramadani zgjodhi të qëndrojë. Ai nuk e braktisi asnjëherë ditarin dhe as nxënësit, duke dëshmuar një përkushtim të palëkundur ndaj misionit të tij arsimor.

Për 11 vite ai drejtoi me sukses shkollën fillore “Dëshmorët e Kombit” në Livoç të Poshtëm, derisa nga viti 2011, vazhdoi të jap kontributin e tij të çmuar si mësimdhënës në shkollën fillore “Rexhep Elmazi” në Gjilan, e një kohë edhe si drejtor i këtij institucioni arsimor.

Përveç mësimdhënies, ai luajti një rol të rëndësishëm në formimin e vetëdijes kombëtare tek nxënësit, duke folur për luftën e drejtë për lirinë e Kosovës dhe rëndësinë e ruajtjes së gjuhës shqipe.

Sot, ndërsa përmbyll një kapitull të rëndësishëm të jetës së tij profesionale, trashëgimia që lë pas nuk matet vetëm me vite pune, por me ndikimin e thellë që ka pasur në jetët e shumë nxënësve.

Figura si ajo e Nehat Ramadanit mbeten gurë themeli në historinë e arsimit në Kosovë, duke dëshmuar se përkushtimi dhe dashuria për dijen janë vlera që i rezistojnë kohës.   /2LONLINE/