Pensionohet Ilmi Limoni

Pas një kontributi shumëvjeçar në institucionet përkatëse në Komunën e Gjilanit, përkatësisht në Drejtorinë për Buxhet dhe Financa, ku është dalluar me profesionalizmin e treguar përmes punës së çmuar, është pensionuar Ilmi Limoni.

Kontributi i Ilmi Limonit nëpër etapa kohore, ishte i dukshëm e i çmuar kudo ku ka punuar. Si ekonomist i diplomuar në fund të viteve 80-ta, ka punuar në Kombinatin e Tekstilit, pastaj në fillim të viteve të 90-ta ka punuar si profesor në shkollën ekonomike “Marin Barleti”, paoshtu ka qenë edhe në Këshillin për Financim, transmeton 2LONLINE.com.

Nga viti 2000, ka punuar në Komunën e Gjilanit ku ka shërbyer zellshëm si auditor, zyrtar kryesor financiar dhe si ushtrues detyre i Drejtorit për Buxhet dhe Financa, për të vazhduar deri më sot ku edhe është pensionuar si udhëheqës i sektorit të buxhetit në Drejtorinë për Buxhet dhe Financa.

Kolektivi me të cilin ka punuar, sidomos ata në Drejtorinë për Buxhet dhe Financa janë shprehur falenderues për bashkëpunimin që e kanë pasur me të si dhe kolegialitetin e treguar, duke e uruar për pensionimin dhe duke i dëshiruar jetë të gjatë e të lumtur. /2LONLINE/