PDK, u mund nga brenda vetës!

PDK, u mund nga brenda vetës!

PDK, u mund nga brenda vetës! Nga të padisiplinuarit brenda partisë dhe servilët ende të “pazbuluar”.

Shkruan: Gani NEZIRI

Kaluan tri ditë që kur zgjedhjet e jashtëzakonshme përfunduan. Rezultoi se PDK humbi besimin e qytetarëve të Kosovës. Në mënyrën më “xhentillmen” e qytetare (ashtu qysh nuk jemi mësuar të shohim në Kosovë), kryetari i saj, z.Kadri Veseli pranoi humbjen krejt qetësisht.

Humbja e garës së jashtëzakonshme zgjedhore të PDK-së, ndoshta, mund të shpjegohet me një fjali të vetme: sabotimi i kryetarit Kadri Veseli nga të “domosdoshmit” dhe nga të padisiplinuarit brenda partisë!

Këtu hyjnë edhe disa servilë e mashtrues (të “afërt” me të afërmit e Kryetarit) me ide “gjeniale” duke ofruar propozime kandidaturash nga kuadrat e shkolluara “profesionale”- periferike, që në fakt, nuk kanë asnjë lidhje emocionale me PDK-në. Po ashtu, edhe votuesit e mirëfilltë të PDK-së nuk kishin asnjë emocion për votimin e tyre, (natyrisht as unë jo).

Për më tepër, ato kuadro fyenin e përçmonin PDK-në deri pak kohë para se të ishin në listën e PDK-së. Po ashtu kishte edhe të tillë që nuk kishin asnjë lidhje emocionale me PDK-në . Për më tepër, shquheshin për përçmimet që ia kanë bërë PDK-së, derisa nuk ishin në listën e PDK-së.

Informatat e rrejshme nga terreni që i depononin servilët e rrugëtimeve tinëzare dhe “këshillat” mashtruese të bashkëpunëtorëve të afërt i kanë devijuar arsyen e veprimeve kohezive.

(Në fakt, gjithë krerët politik ndeshen me këshilltarë mashtrues)!

Pastaj, dëm të pakrahasueshëm i solli edhe afera “pronto” dhe të suspenduarit e kësaj afere nga kryetari Veseli. Ata, në vend se të respektonin vendimin e kryetarit Veseli që t’i përmbaheshin rregullit politik të mosparaqitjes në publik, bënë veprimin e kundërt; u dukën prezent më shumë se kurrë, madje në plan të parë, në gjithë fushatën e PDK-së, sa këtu e sa atje.

Pra, pikënisja politike e Kadri Veseli për luftimin e korrupsionit në Kosovë (që fillimisht dukej shumë serioze dhe u mirëprit nga ana e qytetarëve) u relativizua pikërisht nga bashkëpunëtorët e tij si, ish deputetë, e ish kryetarë komunash.

Pra, PDK nuk u mund nga kundërshtarët politik partiak, VV dhe LDK por, u mund nga bashkëpartiakët e padisiplinuar brenda partisë dhe servilët ende të “pazbuluar”.

Gjithsesi që mund të jetë edhe pak më ndryshe për ta shpjeguar më kuptueshëm këtë mosbesim qytetarësh!

Ky artikull nuk pasqyron qëndrim editorial të redaksisë! Për më tepër, ju lutem lexoni kushtet e përdorimit.

KOMENTE