PDK: S’heqim dorë nga kryetari sepse shkelim Kushtetutën

Lidershipi i Partisë Demokratike të Kosovës (PDK) ka mbajtur sot takim me Kryetarët e Degëve të PDK-së, si dhe takim me Grupin Parlamentar të PDK-së.

“Në të dy këto takime i është dhënë mbështetje e plotë Kryesisë së PDK-së në angazhimet e saj konstruktive për tejkalimin e ngërçit politik dhe për themelimin e institucioneve shtetërore.

Ne kemi ritheksuar se qasja bllokuese e Bllokut opozitar është e papranueshme dhe se bllokimi i konstituimit të Kuvendit është në kundërshtim me interesat e qytetarëve të Kosovës, si dhe shkon në dëm të stabilitetit institucional të vendit.

Po ashtu, kemi shprehur respekt për interesimin e Presidentes së Republikës së Kosovës rreth situatës së krijuar, duke vlerësuar rolin e saj kushtetues si unifkuese dhe garantuese e funksionimit kushtetues të institucioneve shtetërore.

PDK ka mbështetjen e plotë të të gjitha strukturave të saj për të vazhduar rolin e saj konstruktiv dhe proaktiv në procesin e themelimit të institucioneve shtetërore, si dhe fton edhe partitë e tjera parlamentare që të heqin dorë nga bllokada institucionale dhe t’i hapin rrugë implementimit të vullnetit qytetar, të shprehur në zgjedhjet e 8 qershorit, që ka nxjerrë PDK-në si fituese të zgjedhjeve dhe mandatare për themelimin e Qeverisë së ardhshme të Republikë së Kosovës.

Partia Demokratike e Kosovës konsideron se konstituimi sa më i shpejt i Kuvendit është i domosdoshëm dhe duhet të ndodh në pajtim të plotë me Kushtetutën e Republikës së Kosovës, me aktgjykimin e Gjykatës Kushtetuese në rastin KO 119/14, si dhe me Rregulloren e Punës së Kuvendit, që i garantojnë PDK-së, si grupit më të madh parlamentar të drejtën e patjetërsueshme dhe të patransferueshme për të nominuar kandidatin për Kryetar të Kuvendit.

PDK mbetet e hapur për të bashkëpunuar me të gjithë për të mirën e vendit dhe për themelimin e shpejtë të institucioneve shtetërore, por gjithmonë në pajtim me vullnetin e shprehur të qytetarëve të Kosovës dhe në pajtim me Kushtetutën e vendit”, thuhet në kumtesën e PDK-së.