PDK-LDK, koalicion i zorit
Deputeti i Kuvendit nga radhët e Nismës për Kosovën, Jakup Krasniqi, ka thënë se arritja e koalicionit ndërmjet PDK-së dhe LDK-së nuk përbën asnjë risi për qytetarët e Kosovës.
Krasniqi këtë koalicion e ka quajtur koalicion të zorit. “Nuk është lehtë të jepet një vlerësim i këtij koalicioni, kur edhe vetë aktorët e këtij koalicioni e quajnë: ‘koalicion të zorit’. Për çfarë zori po flasin ata? Në këtë rast, arsyeja e shëndosh nuk ka si mos ta shtrojë pyetjen: Nëse ky koalicion është në interes të qytetarit, pse nuk u arrit brenda afatit optimal (30 ditë pas rezultatit zyrtar të zgjedhjeve)? Pse u deshtë të kalojnë pesë e më shumë muaj deri te konstituimi i Kuvendit (që ende nuk është konstatuar) dhe ndarja e posteve qeveritare?”, ka thënë Krasniqi në intervistën për “Epokën e re”.
Ai ka shprehur skepticizëm se ky koalicion do të mund të sjellë ndryshime pozitive. “Ky koalicion nuk përbën ndonjë risi për qytetaret e vëmendshëm të Kosovës, aq më pak për njerëzit që kanë qenë pjesë e politikës dhe janë rritur me këto parti politike, të cilat kanë vështirësi për t’i qëndruar besnik asaj që e deklarojnë. Për mua nuk është problem se a do të shkojnë deri në fund, e rëndësishme është sa do t’i përfitojnë qytetarët nga qeverisja e këtij koalicioni, apo do të përfitojnë vetëm qeveritarët e të dy partive të koalicionit. Unë mbes skeptik, se ky koalicion do të sjellë ndryshime pozitive në qeverisjen e vendit. Dëshiroj të jam i gabuar në atë që thash!?”, ka vlerësuar Krasniqi, duke shtuar se gjatë të gjitha mandateve që kanë qeverisur e bashkëqeverisur këto dy parti, qytetarët nuk kanë vërejtur sundim të ligjit, aq më pak zhvillim ekonomik e mirëqenie qytetare.
Duke e komentuar arritjen e koalicionit PDK – LDK pesë muaj pas zgjedhjeve, Krasniqi ka shprehur keqardhje që mashtrimi vazhdon të mbetet vlerë e politikës sonë. “Pas zgjedhjeve (me formimin e koalicionit paszgjedhor), u duk se politika jonë kishte arritur një pjekuri politike për të marrë vendime autonome e në interes të vendit. U duk, gjithashtu, se në politikën tonë fjala e marrëveshjes po merrte dimensione të reja vlere. Se politika jonë po bisedonte pa ndërmjetësues për interesat e vendit. Se qëllimi i saj nuk ishte fati apo fatet personale të individit/ve, por në rend të parë po dilte interesi i qytetarëve dhe i vendit. Në fund, të gjitha këto mbeten një ëndërr e mirë. Më vjen keq që mashtrimi vazhdon të mbetet ‘vlerë’ e politikës sonë, nëse dëshiron të mbijetosh!?”, ka deklaruar ai.
Krasniqi ka vlerësuar se në cilindo vend ku formohen koalicionet e mëdha, opozita ka vështirësi për ta kryer rolin e saj kushtetues mirëpo, sipas tij nëse ka unifikim, opozita mund të shpalosë vlera të reja opozitare e demokratike. “Tek ne këtë vështirësi e shton edhe vetë niveli i demokracisë, e cila lë për të dëshiruar shumë. Tek ne vështirësinë e ngrit në një shkallë edhe mungesa e numrave, por besoj shumë se edhe opozita do të ketë rast t’i tregojë vlerat e saj politike. Kjo opozitë, nëse vërtet dëshiron të tregohet në përgjegjësinë e detyrës, unifikimi bëhet domosdoshmëri, por secili grupim politik duhet ta tejkalojë vetveten”, ka theksuar Krasniqi.
http://www.epokaere.com/index.aspx?SID=13&PMID=2&LID=2&ACatID=1&AID=55900&Ctype=1