PDK: Kur mediat ua rikujtojnë pushtetarëve që kokën s’e kanë më lart se aty ku ua ka falë Zoti!

Ruana Zot,  po të mos ishin mediat e lira t’ia rikujtojnë pushtetarëve, që kokën s’e kanë më lart se aty ku ua ka falë Zoti. Distancimi verbal i komunës lidhur me incidentin, kërcënimin e njërit prej drejtorëve komunal të Gjilanit ndaj gazetarit të “Rajonipress”, z.Musa Sabedini, ndonëse shihet si një satisfaksion, është i pamjaftueshëm dhe nuk duhet të jetë kjo fjala e fundit ndaj keqpërdoruesve dhe kërcënuesve të medias së lirë, thuhet në reagimin e PDK-së, dega në Gjilan, përcjellë Shefik Surdulli, në emër të zyrës për informim të këtij subjekti dhe në cilësinë e këshilltarit komunal.

Sipas këtij reagimi, “një akt i tillë për ne është i papranueshëm dhe shqetësues, ngase paraqet shkelje serioze të transprencës mbi informimin publik, si obligim dhe detyrim ligjor i komunës”.

“Prandaj, Dega e PDK-së në Gjilan, vëhet fuqishëm në mbrojtje të fjalës së lirë, të medias së lirë, si fundament i demokracisë së saj, të cilën edhe qeveria komunale është e obliguar ta respektojë, e jo të pengojë, kryerjen e detyrës publike të medias për ta informuar publikun, drejt dhe shpejt, siç ishte rasti i djeshëm i kërcënimit ndaj gazetarit të «Rajonipress”, z. Musa Sabedini”, përcjell reagimin Shefik Surdulli.

Më tej ai thotë se është ky edhe një rast, i cili do të duhej seriozisht t’ia tërheq vëmendjen kryetarit të Gjilanit, z. Lutfi Haziri, për nivelin e ulët të disiplinës në qeverisjen e tij, përveç abuzimeve tjera serike me pushtetin, e që po vazhdon edhe në këtë mandat.