PDK-ja i thotë po takimit të ftuar nga kryesuesi i Kuvendit

“PDK-ja është e gatshme për të qenë pjesë e takimit me të gjitha subjektet politike, të ftuar nga kryesuesi i Kuvendi Komunal të Gjilani, Kushtrim Kadriu për të tejkaluar situatën e miratimit të buxhetit komunal 2025”, ka thënë Riad Rashiti, kryetar i PDK-së, dega në Gjilan.

Me këtë rast, ai ka listuar prioritetet e PDK-së lidhur me miratimin e buxhetit 2025, që tha se mbeten të njëjtat dhe janë këto:

1. Buxheti i vitit 2025 t’i shërbejë qytetarëve të Gjilanit dhe jo interesave të fushatës zgjedhore të kryetarit të komunës

2. Rritja e sigurisë së qytetarëve të Gjilanit përmes investimeve në projekte të infrastrukturës dhe me shërbime cilësore

3. Zbatueshmëria e procedurave dhe ligjeve të Republikës së Kosovës, në planifikimin dhe shpenzimin e buxhetit komunal

4. Transparenca dhe llogaridhënia në shpenzimin e parasë publike

5. Krijimi i mekanizmit nga ana e Kuvendit Komunal për mbikqyrjen e realizimit të projekteve sipas planifikimit në buxhetin komunal 2025

Rashiti i PDK-së ka thënë se për realizimin e këtyre prioriteteve është i domosdoshëm bashkëpunimi mes subjekteve politike, Kuvendit Komunal dhe ekzekutivit të komunës. Qytetarë e Gjilanit nuk duhet të pësojnë për teke dhe kokëfortësinë e askujt.

“Ne, si PDK, sot do të marrim pjesë në takimin e ftuar nga kryesuesi i Kuvendit Komunal, Kushtrim Kadriu, me vullnetin dhe gatishmërinë tonë për të gjetur rrugën e miratimit të buxhetit komunal për vitin 2025, duke besuar në qasjen konstruktive të të gjitha palëve vendimmarrëse në këtë proces”, ka thënë Riad Rashiti, kreu i PDK-së së Gjilanit.  /2LONLINE/