PDK-ja e Gjilanit: Kjo krizë e ky jostabilitet i krijuar duhet të marrin fund

Partia Demokratike e Kosovës, Dega në Gjilan, ka mbajtur një takim të hapur, siç është thënë, me qytetarë kontributdhënës, ku në fokus ishte diskutimin për sfidat dhe perspektivën e zhvillimit politik, social dhe ekonomik në vend.

Dega e PDK-së ka bërë të ditur se gjatë diskutimeve me qytetarët janë trajtuar çështje që lidhen me gjendjen politike, sociale dhe ekonomike në Kosovë.

Sipas PDK-së, pjesëmarrësit janë pajtuar se vendi po përballet me krizë dhe mungesë stabiliteti institucional, duke theksuar nevojën për ndryshim politik, transmeton 2LONLINE.

“Në takimin e sotëm me qytetarë kontributdhënës diskutuam për gjendjen tonë politike, sociale e ekonomike. Njëzëri u pajtuam që kjo krizë e ky jostabilitet i krijuar duhet të marrin fund”, thuhet në deklaratën e PDK-së.

Në të njëjtën deklaratë, PDK-ja e Gjilanit, ka shprehur mbështetje për liderin e tyre, Bedri Hamzën, si kandidat për kryeministër për zgjedhjet e parakohshme të 7 Qershorit, duke theksuar se “Ndryshimi për Kosovën bëhet vetëm me Bedri Hamzën, Kryeministër”.  /2LONLINE/