PDK: Gjilani nuk mund të udhëhiqet me mashtrime, viktimizim dhe abuzim me procedurat
Në lidhje me zhvillimet e fundit në Kuvendin Komunal të Gjilanit, përkatësisht në lidhje me rregulloren për Sistematizimin e Vendeve të Punës në Shërbimin Civil, ka reaguar edhe Partia Demokratike e Kosovës (PDK), dega në Gjilan
“Kryetari i Komunës së Gjilanit, Alban Hyseni, çdo ditë e më shumë po e forcon epitetin e mashtruesit dhe manipuluesit politik. Viktimizimi i tij i përsëritur se “opozita nuk po i voton propozimet” është sa i turpshëm, aq edhe thellësisht manipulativ. Në seancën e fundit të Kuvendit Komunal, vetëm 20 minuta para fillimit, ai solli për votim rregulloren për shërbyesit civil, një dokument me dhjetëra faqe në kundërshtim të plotë me çdo procedurë ligjore e standard etik”, thuhet në reagimi ne PDK-së së Gjilanit.
Sipas këtij subjekti politik, opozitë në Gjilan, ky është shembulli më i qartë i qeverisjes së fshehtë, të papërgjegjshme dhe të dështuar
“Si mund të kërkosh votë e besim nga anëtarët e Kuvendit, kur as nuk u jep kohë për të lexuar e analizuar një dokument kaq të rëndësishëm? A ka më qartazi shkelje të transparencës dhe përbuzje ndaj demokracisë lokale? Ky model i kontrabandimit politik nuk kalon më. Gjilani nuk mund të udhëhiqet me mashtrime, viktimizim dhe abuzim me procedurat”, thuhet tutje në reagim.
Për PDK-në e Gjilanit qytetarët e meritojnë një qeverisje të ndershme, transparente dhe me përgjegjësi. /2LONLINE/