PDK: E votuam buxhetin për t’ua hequr nga gjuha justifikimin se opozita po e pengon punën

Kuvendi i Komunës së Gjilanit, në seancën e jashtëzakonshme të udhëhequr nga kryesuesja Krenare Latifi-Kqiku, ka miratuar buxhetin për vitin 2026, në vlerë prej 41.928.924 €, me 33 vota për dhe asnjë kundër.

Pra, pro buxhetit kanë votuar edhe anëtarët e Kuvnedit nga radhët e PDK-së, subjekt opozitar, që përmes një deklarata më pas, ka bërë me dije se: “Vështirë se do të realizohet diçka; megjithatë, ne si grup e votuam buxhetin për t’ua hequr nga gjuha justifikimin se opozita po e pengon punën. Tash buxheti u votua, mbetet të shihet nëse do të bëhet ndonjë punë e hajrit”.

Ja deklarata e plotë e Degës së PDK-së

Sot, në një seancë të jashtëzakonshme dhe në kushte edhe më të jashtëzakonshme (26 vite pas luftës, takimin e mbajtëm në korridorin e shkollës, me qytetarë që hynin e dilnin si në treg), u miratua buxheti i Komunës sonë në vlerë prej 42 milionë euro.

Me këtë rast, grupi ynë nga PDK-ja dha propozimet dhe vërejtjet e veta, ku një pjesë e tyre u futën në projektbuxhet nga ana e Kuvendit si të domosdoshme.

Vështirë se do të realizohet diçka; megjithatë, ne si grup e votuam buxhetin për t’ua hequr nga gjuha justifikimin se opozita po e pengon punën. Tash buxheti u votua, mbetet të shihet nëse do të bëhet ndonjë punë e hajrit.

Ne mbesim skeptikë, sidomos kur shihen zero mjete të parapara për shëndetësi dhe vetëm 2.46 për arsim, ndërkohë që komuna është e zhytur në borxhe deri në fyt. Me këtë keqplanifikim të buxhetit, shtrohet pyetja se si do të zhvillohet Komuna jonë dhe si do të ndihmohen qytetarët.