PDK dorëzon në Kushtetuese lëndën për konstituimin e Kuvendit

Partia Demokratike e Kosovës (PDK) ka dorëzuar sot në Gjykatën Kushtetuese të Republikës së Kosovës kërkesën për vlerësimin e kushtetutshmërisë së vendimeve dhe procedurave që lidhen me konstituimin e Legjislaturës XI të Kuvendit të Kosovës.

Kërkesa është dorëzuar nga Kryetari i Grupit Parlamentar të PDK-së, Arian Tahiri, deputeti Përparim Gruda dhe avokati Faton Fetahu.

Tahiri, tha se PDK-ja po e dërgon sot këtë çështje në Gjykatën Kushtetuese për të marrë një përgjigje përfundimtare për shkeljet që, sipas saj, kanë përcjellë procesin e konstituimit të Kuvendit.

Ndërsa Deputeti Gruda theksoi se kërkesa e PDK-së ka për qëllim rikthimin e funksionimit institucional mbi bazën e Kushtetutës. Sipas tij, në Republikën e Kosovës rregullat i përcakton Kushtetuta, jo vullneti politik i një partie dhe as interpretimet që ndryshojnë varësisht prej interesit të momentit.

Avokati Faton Fetahu tha se krahas kërkesës kryesore, është kërkuar edhe vendosja e një mase të menjëhershme të përkohshme.

“I kemi kërkuar Gjykatës Kushtetuese që të vendosë menjëherë masë të përkohshme, në mënyrë që të parandalohet prodhimi i pasojave të mëtejshme juridike dhe institucionale nga një proces, kushtetutshmëria e të cilit tashmë është kontestuar para Gjykatës. Deri në vendimin e saj, nuk duhet të krijohen fakte të reja që mund ta thellojnë edhe më tej krizën kushtetuese”, ka thënë  Fetahu.