Pastroje oborrin tënd!

/Demokracia ndërtohet me forcën e votës, jo të fjalës, sepse demagogët flasin mirë, por veprojnë keq! E keqja më e madhe është se në politikën tonë, janë kyqur shumë të pandershëm, të cilët nën hijen e kostumeve, çantave e kravatave, mbulohen dhe harrojnë kush ishin, e kush janë! Kërkojnë ndershmëri në llojin dhe sojin e tjetrit , duke harruar llojin dhe sojin e vet!/

(2LONLINE) – Ç`mu kujtua një batutë.
E pyeti politikani një qytetar gjatë fushatës;
Sa vjeç je , o bac ?
– 84 , i përgjigjet plaku.
– S`po tregon që e ke atë moshë. Sigurish nuk e pi cigaren, ia ktheu politikani.
– Jo , cigaren e pi , nga mosha 18-20 vjeçare , i përgjigjet plaku!
– Aha, sigurisht je marr me sport sigurisht , ia ktheu politikani.
-Jo , por jam marr me punët e mia , e si kam shikuar punët e huaja, ia ktheu plaku.
Politikani, heshti, sepse mbeti pa tekst!

He bre , po popull sui generis që jemi ! Teksa po lexoja gazetat e përditshme, portalet, po ndeshë në lloj-lloj shkrimi, analize, vështrimi … E mirë demokracia , a ? Fol çka te duash, shkruaj çfarë të duash, merru me çfarë të duash,…ama sikur të besonin njerëzit ! Po ky populli ynë, këto tre dekadat e fundit është futur thellë në politikë dhe qe besa edhe po i lexon more politikat. Me që pata nge, thash të shti rruza në pe, edhe unë ! Por, më tepër desha t`trokas në ndërgjegjen e atyre, që nuk janë tipa, që flasin ndryshe e veprojnë ndryshe dhe atyre që nuk e dinë hallin e kaçikun e vet!

Po lexoj se filan fistek politikani, po u bënë vërejtje politikanëve profesionist, ndër më të votuarit në vend, po tregon se si “nn” partia politike po bënë sehir, po flet ashtu e kështu paradite, ndërsa pasdite po e ndërron kursin ! Dhe merre me mend, duke u munduar ta kruaj njërin e ta verboj tjetrin, po ndodh e kundërta. Madje çka është më interesante se nëse lëshohemi në një analizë të thellë, po del se partia e tij, ia paska thyer parti së dhe liderit të këtij të dytit!

Politikani tjetër, në vend se ta kujtoj dhelprën së cilës i ishte kallur bishti, e ajo mendonte se është ëndërr, kërcënon se do ta bëjë këtë e atë, se është fillimi i mandatit , se … duke harruar se opozita, nuk është bash sikur pozita ! Dhe mere me mend, premtojnë se do të angazhohen për popullin, për votuesit, për të sanuar gjendjen, duke harruar që deri dje si pushtetar, sen s`ka lënë pa bërë, por jo për të ndihmuar, përkundrazi kanë zhvatur, e janë zhytur edhe në mjerimin e thellë të popullit ! Të qenit opozitë është gjë e mirë, bile më e mirë se pozita, sepse je zëri i arsyes, sepse s`të hyn leku i zhvatur në xhep, sepse llogaridhënia është më e lehtë !

Del zonja politikane e deklaron” Sikur njerëzia do të ishte grua apo NËNË bota nuk do të ndjente dhimbje e as vuajtje“, duke harruar se deri sa ishte në pushtet, ishte edhe grua edhe nënë, edhe intelektuale edhe pushtetare dhe bota po rënkonte nga dhembjet e politikës, gruaja po përbuzej, nëna po nëpërkëmbej,…! Sot kur ajo nuk është ku ishte, sepse populli e pa kontrabandën, lëvizjet në stlin mos u bëftë në xhenet, bile në xhenem të jem, qirret se u bë nami se si femrat nuk janë të përfaqësuara, se femrave s`u ipet hapësirë, se…! Jo , jo e respektuara politikane, nuk u kall dynjaja, por bishti yt, dhe ja ku të them, flaka do të zgjatë gjatë për ty, sepse vet i pa, nga subjekti yt reaguan gratë politikane, pse në subjektin tënd, u futën pjatat fluturuese !

Demokracia ndërtohet me forcën e votës, jo të fjalës, sepse demagogët flasin mirë , por veprojnë keq ! S`është nënë gruaja, motra e bija , ajo e cila me 50-60 vota ia zë vendin burrit, vëllait e prindit që ka 5-6 herë vota më shumë se ajo !

Del ai tjetri alamet politikan , dhe qirret e qirret se si këto sondazhe nuk janë të pranueshme, se janë bërë me tendencë për të ulur imazhin e “nn” partisë politike ,…! Po ti bre… ! Po a shumë po të interesojnë sondazhet , a ? Sondazhet janë parashikime , s`janë gjë tjetër ! Iha sa herë Sylë Tahirsylaj s`ia ka qëlluar . Dhe askush nuk është hidhëruar, bujqit punëtor i kanë grahur punës , ndërsa dembelët , kanë qëndruar duke bërë sehir, për ta paguar në të vjelat e para ! Pra grahi b… dhe puno për vete , për vendin dhe subjektin tënd , e mos u merr me sondazhe !

E keqja më e madhe është se në politikën tonë , janë kyqur shumë të pandershëm , të cilët nën hijen e kostumeve, çantave e kravatave, mbulohen dhe harrojnë kush ishin, e kush janë ! Kërkojnë ndershmëri në llojin dhe sojin e tjetrit , duke harruar llojin dhe sojin e vet!

Lexova se si një anëtare e komitetit të arsimit , kishte bërë kritika të ashpra në punën e DKA-së dhe kishte nxjerr në pah të metat që janë shënuar vite me radhë ! Thash më vete; vallë, athua kaq lehtë e shpejtë po sanuakan të metat dhe dobësitë në arsim …?! Po jo, moj e çmuara profesoreshë ! Arsimi është sistem që as nuk shkatërrohet me shkop magjik, e aq më pak të mëkëmbet në atë mënyrë . Detyrë jona është t`i kryejmë punët tonë aty ku gjendemi, ndërsa ata që e morën votën, të përkujdesen për zotimet e dhëna. Fundja, secili jep llogari për punën e vet, apo jo !

Gjithashtu, njëherë e përgjithmonë duhet të mësohemi, se humbësit apo dështakët duhet dhe mund të ndihmojnë, por assesi t`a hedhin vallen, sepse po t`a kishin udhëhequr vallen si duhet, do ta kishin marrë bekimin e Zotit-popullit. Fundja, politika s`është gjë tjetër pos art, mu sikur noti dhe mund të jesh akademik por të fundosesh, apo e kundërta analfabet dhe të notosh, në cilindo stil …! Këtë tashmë e kemi provuar shumë herë, si me Akademik Rexhep Qosjen, ashtu edhe me Akademik Nexhat Dacin! E mira e së mirës do të kishte qenë, kur i posedojmë edhe titujt akademik edhe shkathtësitë e notit, e nëse nuk i kemi, atëherë një shkop të shkurtër dhe të mbrojmë vetëm veten tonë ! S`na nënçmon kush, më shumë se vetja jonë ! Pleqtë thoshin, e kojtmja të korit (interesi të turpëron)!

/Nehat M.Ramadani/