Pas dy rasteve tragjike në Livoç e Pogragjë, reagon kryetari i komunës, do të ftojë mbledhje urgjente të Këshillit Komunal për Siguri në Bashkësi

Pas dy rasteve tragjike, vrasjes së dyfishtë që ndodhi të premten në Livoç të Ultë dhe sonte, vrasja e një të riut në Pogragjë të Gjilanit, ka reaguar kryetari i Komunës së Gjilanit, Alban Hyseni, i cili, për të adresuar këtë gjendje, nesër në mëngjes ka thënë se do të thërret një mbledhje urgjente Këshillin Komunal për Siguri në Bashkësi.

“Së bashku me udhëheqjen e Policisë së Kosovës dhe të gjitha organet e rendit dhe të ligjit, do të koordinojmë hapat e menjëhershëm për të garantuar rendin publik dhe sigurinë në çdo pjesë të komunës sonë”, ka thënë Hyseni.

Ja reagim i tij i plotë:

Të dashur qytetarë të Gjilanit,

Komuna jonë po përballet me një situatë të rëndë pas dy ngjarjeve tragjike. Pas vrasjes së dyfishtë që ndodhi të premten, qyteti ynë u prek përsëri sonte nga një tjetër incident me pasojë humbjen e jetës.

Në emër të Komunës së Gjilanit dhe në emrin tim personal, u shpreh ngushëllimet më të sinqerta familjeve që humbën më të dashurit e tyre në këto dy ngjarje, ndërsa të lënduarve u uroj shërim të shpejtë.

Për të adresuar këtë gjendje, nesër në mëngjes do të thërras në mbledhje urgjente Këshillin Komunal për Siguri në Bashkësi. Së bashku me udhëheqjen e Policisë së Kosovës dhe të gjitha organet e rendit dhe të ligjit, do të koordinojmë hapat e menjëhershëm për të garantuar rendin publik dhe sigurinë në çdo pjesë të komunës sonë.

Mbrojtja e jetës së qytetarëve tanë është prioriteti ynë kryesor institucional. Komuna e Gjilanit do të përdorë të gjitha kompetencat e saj për të bashkëpunuar me organet e sigurisë në menaxhimin dhe parandalimin e rasteve të tilla.

I ftoj të gjithë qytetarët për maturi, qetësi dhe bashkëpunim të plotë me organet e rendit. /2LONLINE/