Pas dorëheqjes së drejtoreshës për Buxhet dhe Financa deklarohet edhe i pari i komunës së Gjilanit

Pas dorëheqjes së parevokueshme të Herolinda Murati Leka, drejtoreshë e Drejtorisë për Buxhet dhe Financa në Komunën e Gjilanit, dhe reagimeve të mëpastajme të opozitës në Gjilan, tani është deklaruar edhe kryetari i komunës së Gjilanit, Alban Hyseni.

Ja deklarata e tij e plotë:

Siç është bërë tashmë e ditur, sot kam pranuar dorëheqjen e drejtoreshës për Financa dhe Buxhet.

Jam i vetëdijshëm për shqetësimet e ngritura dhe i kam ndjekur me vëmendje të gjitha akuzat e bëra publike. Meqenëse organet e rendit janë të njoftuara dhe po trajtojnë këtë çështje, presim që e vërteta të përcaktohet përmes proceseve ligjore dhe vendimeve përkatëse.

Unë refuzoj që të komunikoj me gjuhën e njëjtë, sepse besoj te faktet dhe te e vërteta të cilën e kanë parasysh të gjitha palët, pavarësisht se si e proklamojnë.

Si kryetar i komunës, siguroj qytetarët se institucioni ka funksionuar dhe do të vazhdojë të funksionojë me transparencë dhe profesionalizëm. Askush nuk ka pasur qasje të paautorizuar në një zyrë kaq të ndjeshme, e aq më pak ndonjë aktivist i Lëvizjes.

Përgjatë javëve të fundit, fokusi im kryesor ka qenë siguria e një menaxhimi të drejtë dhe të përgjegjshëm të buxhetit komunal, i cili tashmë është votuar dhe do të shërbejë për të përmbushur nevojat dhe prioritetet e qytetarëve tanë.

Komuna e Gjilanit mbetet e përkushtuar për të vepruar me integritet, duke garantuar llogaridhënie dhe qeverisje të mirë për të gjithë qytetarët. /2LONLINE/