Pal Lekaj shoqërohet në Prokurori

Deputeti i Aleancës për Ardhmërinë e Kosovës (AAK), Pal Lekaj është shoqëruar sot në Prokurori. AAK përmes një komunikate ka vlerësuar se pushteti po vazhdon me masa represive kundër deputetëve të opozitës, duke e mbajtur Pal Lekajn në Prokurori.

“Është krejtësisht e papranueshme hipokrizia e pushtetit, i cili në njërën anë bën thirrje për dialog, e në anën tjetër vazhdon masat represive ndaj deputetëve të opozitës. Pikërisht në ditën për kur kryeministri kishte bërë një ftesë për dialog me opozitën, urdhërdhënësit politik e mbajnë në prokurori deputetin Pal Lekaj, nga AAK, për ta zgjeruar lepezën e presionit politik e policor mbi të zgjedhurit e popullit”, thuhet në komunikatë.

AAK i ka bërë thirrje pushtetit që të heqë dorë nga këto metoda diktatoriale dhe te fokusohet se si ta nxjerr vendin nga kriza, sepse opozita nuk zmbrapset nga kauza e saj e drejtë pavarësisht arrogancës dhe masave që po përdor pushteti.