Pajisje për studio muzikore dhe instrumente dixhitale, Shkolla e Muzikës shpreh mirënjohje për KFOR-in Italian, Regjimentin e Karabinierëve MSU

Shkolla e Muzikës në Gjilan shpreh mirënjohjen dhe falënderimin e saj të thellë për KFOR-in Italian dhe në veçanti për Regjimentin e Karabinierëve MSU, për mbështetjen e çmuar dhe donacionet e ofruara për këtë institucion.

Drejtori I Shkollës së Muzikës në Gjilan, Kushtrim Jakupi, ka thënë se përmes dhurimit të pajisjeve për studio muzikore dhe instrumenteve dixhitale. Regjimenti i Karabinierëve MSU kanë dhënë një kontribut të rëndësishëm në pasurimin e kushteve të punës dhe mësimit në Shkollën e Muzikës në Gjilan.

Sipas Jakupit, ky kontribut nuk përfaqëson vetëm një ndihmë materiale, por është një investim i drejtpërdrejtë në arsim, kulturë, art dhe në të ardhmen e gjeneratave të reja.

“Pajisjet dhe instrumentet e dhuruara do t’u mundësojnë nxënësve dhe mësimdhënësve tanë të zhvillojnë më tej procesin edukativo-artistik, të eksplorojnë mundësi të reja krijuese dhe të avancojnë përgatitjen e tyre muzikore”, ka thënë drejtori Kushtrim Jakupi.

Sipas tij, muzika ndërton ura mes njerëzve dhe kulturave. Pikërisht për këtë arsye, mbështetja ndaj arsimit muzikor është një vlerë që tejkalon kufijtë e një donacioni. Ajo është mbështetje për talentin, përkushtimin, kreativitetin dhe ëndrrat e fëmijëve dhe të rinjve tanë.

“Shkolla e Muzikës në Gjilan e vlerëson lart këtë gjest, duke e konsideruar atë një shembull të shkëlqyer të bashkëpunimit, respektit dhe përkushtimit ndaj komunitetit dhe zhvillimit të arsimit e kulturës. Faleminderit Regjimentit të Karabinierëve MSU- KFOR-it Italian, për mbështetjen dhe përkushtimin ndaj shkollës tonë”, ka thënë Kushtrim Jakupi, drejtor I Shkollës së Muzikës në Gjilan.   /2LONLINE/