Pa e njohur Kosovën, s’ka BE për Serbinë

Ministrja e Shtetit, Edita Tahiri, ka thënë se Serbia është e detyruar ta respektojë parimin e fqinjësisë së mirë me Kosovën. Tahiri ka thënë se respektimi i këtij parimi nga Serbia nënkupton njohjen e shtetit të Kosovës. Në këtë kontekst, ajo ka thënë se Serbia duhet ta harrojë anëtarësimin në BE nëse nuk e njeh Kosovën si shtet. “Serbia nuk mund të anëtarësohet në BE pa e njohur Kosovën, sepse nuk e ka të plotësuar kushtin e fqinjësisë së mirë me republikën tonë”, ka deklaruar Tahiri në një intervistë për Epoka e Re.

Ndërkaq duke folur për dialogun politik me Serbinë, që pritet të rifillojë në shkurt të vitit 2015, Tahiri ka thënë se qysh në takimin e parë do të kërkojnë nga Brukseli që Serbia t’i respektojë marrëveshjet e arritura në kuadër të procesit të normalizimit të marrëdhënieve ndërshtetërore.

Tahiri ka treguar se, përveç kryeministrit Isa Mustafa që do ta drejtojë dialogun politik me Serbinë, pjesë e këtij ekipi do të jetë edhe zëvendëskryeministri, njëherësh ministër i Punëve të Jashtme, Hashim Thaçi. “Në nivelin politik, ashtu siç e ka thënë edhe Brukseli, duhet të jenë z. Isa Mustafa dhe z. Hashim Thaçi. Ky fakt mendoj se është një përbërje reprezentative dhe legjitime e shtetit të Kosovës, duke marrë parasysh edhe koalicionin qeverisës PDK – LDK. Ndërsa nivelin teknik të dialogut do ta drejtoj unë”, ka thënë Tahiri.

Pasi të implementohet marrëveshja e Brukselit, Tahiri ka thënë se do të insistojnë të hapen si tema çështja e reparacioneve të luftës dhe ajo e suksesionit në mes të dy shteteve. Ministrja e Shtetit ka bërë me dije se në Bruksel do të diskutohet për statutin e asociacionit të komunave me shumicë serbe, i cili, sipas saj, nuk do të ketë kompetenca ekzekutive.

Në këtë aspekt, Tahiri e ka quajtur iluzionist Aleksandër Jabllanoviqin, aktualisht ministër për Komunitete dhe Kthim në Qeverinë e Kosovës, i cili ka deklaruar se ky asociacion do të ketë kompetenca ekzekutive. “Iluzionet e individëve, sidomos të zyrtarëve të cilët pak a shumë mendojnë përtej dhe jashtë ligjeve të Kosovës dhe marrëveshjes së Brukselit, janë të lejueshme, por baza ligjore dhe marrëveshja e 19 prillit thonë qartë se asociacioni duhet të krijohet mbi bazën e ligjeve ekzistuese të Kosovës”, është shprehur Tahiri.

http://epokaere.com/index.aspx?SID=13&PMID=2&LID=2&ACatID=1&AID=56941&Ctype=1