“Ora e Privatësisë” përfshihet në orën e parë mësimore në nivel vendi

Agjencia për Informim dhe Privatësi, në bashkëpunim me MAShT, kanë realizuar aktivitetin edukativ “Ora e Privatësisë” e cila u mbajt si orë e parë mësimore, ku nxënësit e të gjitha niveleve arsimore u informuan mbi mbrojtjen e të dhënave personale, rreziqet e përdorimit të internetit dhe rëndësinë e sjelljes së sigurt në hapësirën digjitale.

Aktiviteti u zhvillua në kuadër të shënimit të Ditës Ndërkombëtare të Mbrojtjes së të Dhënave Personale, me ç’rast Agjencia zhvilloi edhe ligjërata të veçanta në shkollat “Ismail Qemali”, “Sami Frashëri” dhe “Faik Konica” të Kryeqytetit, duke bashkëbiseduar me nxënës dhe staf arsimor rreth praktikave të sigurta në përdorimin e teknologjisë.

Komisionerja për Informim dhe Privatësi, znj Krenare Sogojeva Dërmaku, mori pjesë në një panel diskutimi të organizuar nga Shoqata e Bankave të Kosovës, ku u trajtua roli i mbrojtjes së të dhënave personale në institucionet financiare dhe rëndësia e sigurisë së informacionit.

Aktivitetet e ditës u përmbyllën me pjesëmarrjen në “FOL Hapur”, të organizuar nga Lëvizja FOL, ku u diskutuan sfidat aktuale të mbrojtjes së të dhënave personale dhe niveli i vetëdijes qytetare për privatësinë, duke theksuar rëndësinë e edukimit të vazhdueshëm dhe bashkëpunimit ndërsektorial. /2LONLINE/