Opozita: Situata e krijuar kërkon përgjegjësi politike, e jo aksione policore e farsë hetimore!

Njoftimet se prokuroria e shtetit po kryen hetime në sallën e Kuvendit janë qesharake. Ato kanë për qëllim që t’i frikësojnë deputetët e Opozitës, por ju bëjmë me dije se kjo nuk do të kalojë. As futja e policisë në ndërtesën e Kuvendit, kjo me urdhër të Kryetarit të Kuvendit, e as hetimet qesharake të policisë, nuk mund ta zgjidhin këtë situatë jo-normale të shkaktuar nga Qeveria dhe nënshkrimet e kryeministrit.

Kështu thuhet në një komunikatë të përbashkët të lëshuar nga Lëvizja Vetëvendosje, Aleanca për Ardhmërinë e Kosovës, NISMA për Kosovën.

Më tej thuhet:

Ndërhyrja e prokurorisë dhe policisë në Kuvendin e Kosovës është instrumentalizim i këtyre institucioneve për të shtypur opozitën. Ky veprim flet për tentimin e pushtetit që të shndërrohet në pushtet autoritar që situatat e vështira i zgjidhë vetëm përmes ndërhyrjes policore.
Ky vend ka ardhur në një situatë kur duhet t’u japë zgjidhje dy marrëveshjeve që e kanë sjellë vendin këtu ku është, e vetëm pastaj t’i rikthehemi normalitetit dhe jetës institucionale pozitë-opozitë.

Situata e krijuar kërkon reflektim dhe përgjegjësi politike, e jo aksione policore e farsë hetimore!