OJQ “Fortesa”: S’ndalet hovi i luksit!
/2L ONLINE/ – OJQ “Fortesa” kundërshton blerjen e veturave të reja nga Komuna e Kamenicës. Sipas kësaj organizate, qeverisja aktuale e Komunës nuk po e ndalë hovin e luksit. “Ashtu sikurse shumica e premtimeve të krerëve komunalë që janë tretur si kripa në ujë, edhe zotimi për uljen e trendit të blerjeve dhe përdorimit të veturave zyrtare nuk po mbahet”, ka thënë përfaqësuesi i kësaj organizate, Amir Jakupi.
Ai e ka kundërshtuar blerjen e veturës së re, për të cilën Komuna ka nisur procedurat e tenderimit.
“Vitin e kaluar Komuna shpenzoi 50 mijë euro për vetura, të cilat në të shumtën e rasteve përdoren për qëllime private. Derisa gjysma e popullatës së Kamenicës jeton në varfëri, kjo qeverisje po bënë jetë luksi”, është shprehur më tej Jakupi.
Përmes një reagimi, monitoruesi i “Fortesës” ka thënë se “Përdorimi i veturave zyrtare pa aprovim, pa shënim të destinacionit dhe qëllimit” kanë qenë edhe vërejtje të Auditorit dhe nuk janë përfillur.
“Mashtrimi elektoral me shitjen e xhipit dhe ndaljen e luksit, keqpërdorimi i parasë publike, kurdisja e tenderëve, mosndëshkimi i zyrtarëve që s’japin llogari dhe që e rrjepin buxhetin, të tjerëve që përdorin asetet publike dhe nuk kryejnë asnjë punë, nuk janë gjë tjetër veçse vazhdim i rrugës së udhëheqjes së ndëshkuar me votë në fund të vitit 2013”, ka deklaruar Amir Jakupi. /2L ONLINE/