Nxënësit e Gjimnazit “Zenel Hajdini”, realizojnë me sukses tri projekte të rëndësishme

Në kuadër të projektit “Fushatë Avokuese”, nxënësit e Gjimnazit “Zenel Hajdini”, Gjilan, në bashkëpunim me Kosovo Education Center (KEC), kanë arritur të realizojnë me sukses tri projekte me ndikim të drejtpërdrejtë tek nxënësit.

Projekti i parë, “Siguria në shkollë”, u fokusua në krijimin e një ambienti më të shëndetshëm. Në kuadër të tij u vendosën alarme kundër pirjes së duhanit në hapësirat e tualeteve. Në realizimin e këtij aktiviteti kontribuoi edhe një prind i kësaj shkolle, Din Dalipi, përmes kompanisë së tij SAS Security, i cili ofroi mbështetje financiare.

Projekti i dytë, “Përfshirja e të rinjve në vendimmarrje”, synoi fuqizimin e zërit të nxënësve përmes materialeve vetëdijësuese dhe tabelave informuese në shkollë.

Ndërsa projekti i tretë u përqendrua në organizimin e aktiviteteve jashtë orëve mësimore, duke krijuar “Këndin e Mendimit”, një hapësirë ku nxënësit mund të shprehen lirshëm, të ndajnë ide dhe të zhvillojnë aftësitë e tyre përmes diskutimeve dhe aktiviteteve kreative.

“Gjatë gjithë këtij procesi, nxënësit u mbështetën nga psikologia dhe koordinatorja e shkollës. Falënderim i veçantë për drejtorin dhe stafin mësimor për përkrahjen e vazhdueshme. Këto projekte dëshmojnë fuqinë e të rinjve kur u jepet mundësia dhe mbështetja e duhur”, thuhet në njoftimin zyrtar të shkollës. /2LONLINE/