Nuk e ndërpresim grevën deri në realizimin e kërkesës tonë

Nuk e ndërpresim grevën deri në realizimin e kërkesës tonë, që urgjentisht të kthehet Trepça në pronësi të shtetit të Kosovës.

Kështu i kanë thënë Indeksonline anëtari i Këshillit Grevist të minatorëve të Trepçës, Behxhet Vinarci të cilët kanë nisur grevë në horizontin X kundër vendimit të qeverisë që të shtyhet miratimi i projektligjit i cili do të kthente gjigantin kosovar si pronë të shtetit.

Indeksonline iu sjell deklaratën e këtij anëtari të Këshillit grevist i cili e sqaron se vendimi për të nisur grevën është marrë sot në mëngjes në orën 9:30 , ndërsa qeverisë i është dhënë afat 24 orësh që së paku të nis procedurat për miratimin e ligjit që do të kthente Trepçën në pronësi të shtetit të Kosovës.

Nëse kjo nuk ndodh, atëherë minatorët do të marrin vendim të ri për hapat e mëtutjeshëm rreth kësaj çështjeje.

“Në grevë janë të gjithë punëtorët të cilët janë të punësuar në Trepçë…kërkesa jonë e vetme është që të procedohet ligji për kalimin e Trepçës në pronësi të shtetit sa më shpejtë. Ne i kemi dhënë afat qeverisë që brenda 24 orëve të ndërmerr hapat e duhur që të procedojë këtë ligj. Nëse kjo nuk ndodhë atëherë ne do të mblidhemi sërish për të marrë vendimin e radhës”, ka thënë për Indeksonline, Behxhet Vinarci. /Indeksonline/