Nuk do të lejojmë krijimin e temave false që kanë për qëllim ndarjen e Kosovës

Kryeministri i Kosovës, Ramush Haradinaj ka komentuar qëndrimin e Bashkimit Evropian sa i përket Trepçës.

Sipas tij, përmes Trepçës po synohet ndarja e Kosovës, ndërsa vet Trepça nuk është çështje e hapur mes Kosovës dhe Serbisë dhe në asnjë moment populli i Kosovës dhe institucionet e saj nuk do të lejojnë krijimin e temave false

I pari i Qeverisë së Kosovës nuk i ka kursyer as kritikat për BE-në.

Ky është postimi i plotë:

“Reagimi i BE-së kundër miratimit të Statutit të Trepçës nga Kuvendi i Republikës së Kosovës është dëshmi se BE-së i ka humbur rruga në oborr. Deklarata e zëdhënësës së Komisionit Europian, Maja Kocijancic, dhënë mediave serbe, se Trepça duhet të jetë pjesë e Dialogut është qëndrim i papresedan, i papranueshëm dhe, si i tillë cenon sovranitetin e shtetit të Kosovës. Trepça nuk është çështje e hapur mes Kosovës dhe Serbisë dhe në asnjë moment populli i Kosovës dhe institucionet e saj nuk do të lejojnë krijimin e temave false që kanë qartazi qëllim ndarjen e Kosovës”, ka shkruar ai.