Nuhiu: Lajm i mrekullueshëm për nxënësit e shkollave tona profesionale!

“Është arritur marrëveshja dhe është nënshkruar një Memorandum Bashkëpunimi ndërmjet DKA-së dhe Kompanisë “Albimi LTD” SH.P.K., që do t’u mundësojë nxënësve të shkollave profesionale, punësim sezonal gjatë pushimeve verore”, ka bërë me dije Shpend Nuhiu, drejtor i drejtorisë Komunale të Arsimit (DKA), në Gjilan, transmeton 2lonline.com.

Në kuadër të këtij bashkëpunimi, Drejtori Nuhiu, vizitoi nga afër këtë biznes inovativ të prodhimit të biçikletave në qytetin e Gjilanit, duke parë mundësitë konkrete për përfshirjen e të rinjve në tregun e punës.

Nuhiu tha se ky bashkëpunim është një hap domethënës në fuqizimin e arsimit profesional dhe afrim të shkollës me ekonominë lokale.

“Inkurajojmë edhe kompanitë e tjera prodhuese që të na bashkohen në këtë mision për të krijuar më shumë mundësi për të rinjtë tanë. Më shumë mundësi, punë dhe motivim për të rinjtë tanë”, ka thënë drejtori i DKA-së, Shpend Nuhiu.  /2LONLINE/