Nuhiu: Komunën tonë do ta përfaqësojnë 18 nxënës fitues

“Nxënësit e klasave të IX-ta, të cilët do të na përfaqësojnë në garat e fazës së III-të në nivel republikan për gjuhën shqipe, janë gati për sfidën e radhës”, thonë drejtuesit e Drejtorisë Komunale të Arsimit (DKA), në Gjilan.

Kjo është hera e parë që këto gara organizohen në nivel të dy shteteve, Kosovë dhe Shqipëri, duke krijuar një mundësi të re për shkëmbim dijeje dhe përvojash mes nxënësve.

“Besojmë se nxënësit e komunës sonë, falë angazhimit të mësimdhënësve dhe menaxhmentit të shkollave, do të na përfaqësojnë denjësisht edhe në fazën e IV-të, e cila do të zhvillohet mes Republikës së Kosovës dhe Republikës së Shqipërisë. Si komunë, jemi të përkushtuar për krijimin e kushteve më të mira për nxënësit tanë, të cilët tashmë kanë përfunduar dy faza të rëndësishme të garës: atë në nivel shkolle dhe në nivel komunal”, thotë Shpend Nuhiu, drejtor i DKA-së.

Në fazën e parë morën pjesë 256 nxënës, në të dytën 114, ndërsa tani, në fazën e tretë, komunën  e Gjilanit do ta përfaqësojnë 18 nxënës fitues.

Një falënderim i veçantë u shkon edhe komisioneve profesionale për hartimin dhe vlerësimin e testeve, të cilët kanë luajtur një rol kyç në zhvillimin e drejtë dhe cilësor të garave.  /2LONLINE/