Në prag të ndeshjes së xhiros së 8-të, KF Malisheva – FC Drita, kryetrajneri, Ardian Nuhiu dhe futbollisti, Leonat Vitija në konferencë për media njoftuan për përgatitjet dhe atmosferën në klub.
Kryetrajneri, Nuhiu theksoi se Drita duhet të vazhdojë me intensitetin e njëjtë dhe në çdo ndeshje të tregoj vlerë e karakter.
“Duhet të vazhdojmë me intensitetin e njëjtë pavarësisht skuadrës që kemi përballë. Jemi të ndërgjegjshëm për kualitetin e skuadrës sonë, por duhet që në çdo ndeshje apo edhe në çdo stërvitje të tregojmë vlerat tona. Futbolli nuk pranon të kaluarën, por duhet që në çdo ndeshje të tregosh vlerat dhe me qasje të tillë duhet të shprehemi edhe nesër. Nesër duhet ta trajtojmë ndeshjen sikur ajo të jetë e fundit për ne dhe të bëjmë maksimumin për të marr maksimumin. Pres që të performojmë në lojën tonë, pastaj do të tregojmë e të jemi të rrëzikshëm për ta fituar ndeshjen”, ka thënë Nuhiu.
Ndërkaq, futbollisti, Leonat Vitija shpreson në rezultat pozitiv.
“Realisht nesër do të jetë një ndeshje e vështirë, duke e parë që më nuk ka ndeshje të lehta. Duke e parë formën që e kemi në ekip dhe cilësinë që e kemi brenda do të shkojmë të marrin maksimumin nga kjo ndeshje dhe të kthehemi me rezultat pozitiv. Motivi te ne është gjithmonë i njejtë, sepse mundohemi t’i qasemi ndeshjeve me seriozitetin më të madh”, theksoi Vitija.
Përndryshe, trajneri i Dritës, Ardian Nuhiu, poashtu shtoi se FC Drita ka lënë prapa fitoren në derbi dhe i gjithë fokusi është te ndeshja e radhës.
“Çdo fitore rrit besimin te skuadra, por më besoni që me futbollistët e kemi lënë prapa atë ndeshje dhe i gjithë fokusi është te ndeshja e ndesëme. Po e shohim një kampionat të rivalizuar dhe momentin që nuk del te maksimumi yt çdo skuadër mund të ndaloj. Për momentin më gëzon forma e skuadrës dhe nesër duhet të qasemi me shumë autoritet, sepse edhe kundërshtari ka qëllimet e veta dhe mund të befasoj”, potencoi Nuhiu.
Për ndeshjen e nesërme janë të gatshëm të gjithë futbollistët.
Ndeshja, KF Malisheva – FC Drita, zhvillohet nesër e shtunë, ora 15:00 në stadiumin “Liman Gega” në Malishevë. /2LONLINE/
