NPL “Tregu”: Po vazhdon aktiviteti ditor në mirëmbajtjen e hapësirave publike

Ekipet e Ndërmarrjes Publike Lokale “Tregu” në Gjilan po vazhdojnë angazhimin e përditshëm në terren për mirëmbajtjen e pastërtisë në qytet, pavarësisht temperaturave të larta që po mbizotërojnë ditëve të fundit.

Sipas drejtuesve të NPL “Tregu”, puna nis që në orët e para të mëngjesit, kur ekipet realizojnë pastrimin e përmendoreve, si dhe ujitjen e drunjve dekorativë, me përkushtim për ta mbajtur pastërtinë në këto hapësira publike.

Ata bëjnë të ditur se aktivitetet e mirëmbajtjes vazhdojnë gjatë ditës në rrugë dhe ambiente të tjera publike, me qëllim që qyteti të mbetet sa më i pastër dhe i mirëmbajtur, transmeton 2LONLINE.

Drejtuesit e ndërmarrjes kanë shprehur mirënjohje për punëtorët e angazhuar në terren, duke vlerësuar përkushtimin dhe punën e tyre të pandërprerë edhe në këto ditë me temperatura të larta.

“Puna vazhdon çdo ditë në shërbim të qytetarëve”, theksojnë drejtuesit e NPL “Tregu”.   /2LONLINE/