E gjithë bota po pret që dikush nga komuniteti shkencor të njoftojë se është gjetur vaksina kundër coronavirusit, dhe të dalim nga izolimi sa më shpejt që të jetë e mundur, transmeton Plus TV.
Sidoqoftë, derisa shkenca funksionon e është në hulumtime, mijëra versione janë duke u endur në botë për atë që mund dhe nuk mund të shërbejë për të kundërvepruar me simptomat e sëmundjes së rrezikshme që ka marrë mijëra jetë në të gjithë planetin.
Në Kosovë, në vendin me sistemin shëndetësorë më të pa zhvilluar në rajon, ka njerëz që pretendojnë të shkojnë më larg se shkencëtarët e njohur nga Amerika dhe Evropa.
Në rajonin e Anamoravës, dy burra kanë befasuar të gjithë me deklaratat e tyre se mund ta shërojnë koronavirusin. Madje, dy kosovarët dolën edhe në publik me teoritë e tyre ndonëse nuk kishin trajtuar ndonjë pacientë.
Në Gjilan, në muajin mars, kur ky virus preku vendin, një burrë doli në rrjetet sociale e tha se e ka gjetur ilaçin ndaj COVID-19. Kadrush Abazi, një mjek popullor nga Gjilani pretendoi se ka gjetur ilaçin për shërim nga koronavirusi.
Por, i gjithë ky hov nga mjeku popullor, rezultoi me arrestim dhe dërgim për 48-orë burgim nga Policia e Kosovës.
Prokuroria Themelore në Gjilan e ka ndaluar mjekun popullor nën dyshimin për veprën penale ‘Prodhimi dhe shpërndarja e produkteve të dëmshme mjekësore’, shkruan Plus TV.
Përveç arrestimit të tij, policia kishte konfiskuar edhe barin i cili u dërgua për analizë në Institutin Bujqësor të Kosovës.
Bile, më 26 maj, Prokuroria Themelore e Gjilanit njoftoi se ka ngritur edhe aktakuzë ndaj këtij personi, i cili kishte publikuar në “Facebook” njoftimin për vënien në qarkullim të barit për luftimin e koronavirusit.
Sipas aktakuzës, më 6 prill 2020, i pandehuri K.A., në fshatin Përlepnicë Komuna e Gjilanit, ka vënë në qarkullim barëra ose produkte të dëmshme mjekësore, pa iu bërë kontrolli i nevojshëm nga personi apo enti i autorizuar, në atë mënyrë që përmes rrjetit social ‘’Facebook’’, ka publikuar njoftimin për vënien në qarkullim të barit për luftimin e coronavirusit.
“Në këtë mënyrë, i njëjti ka vepruar në kundërshtim me Ligjin për Shëndetësi 04/L-125 dhe Ligjin për Produkte dhe Pajisje Medicinale 04/L-190”, thuhej në komunikatë.
E veç gjilanasit, tentime për “ilaçin” për shërimin e koronavirusit ka edhe dikush në Viti. Ramiz Ramadani nga fshati Smirë po pretendon se ka zbuluar një ilaç të tillë.
Vitiasi që po thotë se me kurën e tij, do të ndryshojë historinë e mjekësisë, tregon se ka barna që i përpunon e me të cilat do të mund ta shëroj një të infektuar e të shpëtoj të sëmurët. I bindur në zbulimin e tij, 53-vjeçi thotë se përbërësit e këtij ilaçi janë sekret. Ai thotë se teoria e tij duhet të merret parasysh nga institucionet e shtetit dhe të testohet “ilaçi” që e përgatit.
Por, për dallim nga pretenduesi i Gjilanit, ndaj të cilit ka reaguar Policia e Prokuroria duke marrë masa për vepër penale, ndaj këtij në Viti, të kontaktuar nga Plus TV, në Policinë Rajonale të Gjilanit, thotë se nuk ka hetim pasi i njëjti nuk ka vepruar asgjë pos pretendimeve që ka shfaqur.
Ismet Hashani, zëdhënës i Policisë tha për Plus TV, se ndaj pretendimeve të këtij personi nuk ka diçka të dyshimtë nga Policia për hetim.
Kurse, Plus TV, ka kontaktuar me Prokurorinë Themelore të Gjilanit, por gjatë ditës nuk ka mundur të marrë një përgjigje.
Po ashtu, Ramiz Ramadani thotë se i shëron edhe disa sëmundje të tjera, falë ilaçeve që ka përpunuar në shtëpinë e tij.
Në botë, ende nuk është gjetur vaksina kundër koronavirusit dhe se hulumtimet nga shkencëtarët botërorë vazhdojnë teksa nga ky virus përditë mijëra njerëz po humbin jetën në gjithë planetin.
Ndryshe, në Kosovë, sipas Institutit Kombëtar të Shëndetësisë Publike, 30 persona kanë vdekur nga CoVid-19, të cilët kanë pasur sëmundje të tjera shoqëruese.
Sipas institutit nga data 08 shkurt deri më 31 maj 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 14.968 persona të dyshimtë në virusin SARS-CoV-2 dhe prej tyre pozitive rezultojnë gjithsej 1.083 raste.
Në vend, numri i përgjithshëm i të shëruarve deri më sot është gjithsej 843 raste./PlusTV/
