Një lajm i mirë, s’ka zjarre në pyje

Këtë vit ende nuk është shënuar asnjë rast i shpërthimit të zjarreve në pyjet e Kosovës. Lajmin e kanë konfirmuar për Radio Kosovën zyrtarë të Agjencisë Pyjore të Kosovës. Ata thonë se kjo është arritur falë përgatitjeve të duhura të Ministrisë së Bujqësisë, e cila për këtë qëllim ka punësuar rreth 120 punëtor, të cilët janë në gjendje gatishmërie 24 orë për intervenime eventuale kudo që paraqitet nevoja.

Përgatitjet me kohë dhe marrja e masave preventive, ka bërë që resurset pyjore të shpëtojnë nga zjarret sivjet. Se rezultatet kanë qenë më të mira në parandalimin e zjarreve këtë vit, e konfirmojnë edhe zyrtarë të Agjencisë Pyjore të Kosovës. Kryeshefi ekzekutiv i Agjencisë Pyjore, Ahmet Zejnullahu, ka thënë për Radio Kosovën se deri më tani nuk kemi pasur asnjë rast të zjarreve nëpër pyjet e vendit.

Faktor kryesor për një gjendje të tillë janë përgatitjet që janë bërë nga Agjencia Pyjore e Kosovës. Zejnullahu potencon se edhe sivjet janë të angazhuar punëtorë, të cilët janë në gjendje gatishmërie 24 orë për të intervenuar në shuarjen e zjarreve, aty ku paraqitet nevoja.

Të dhënat nga Agjencia Pyjore e Kosovës, flasin se gjatë vitit 2012 ishin djegur rreth 3 mijë e 500 hektarë me pyje, në vitin 2013 rreth 50 hektarë. Kurse, këtë vit deri më tani nuk është shënuar asnjë rast i djegies së pyjeve.