Një ekip i QKMF-së u ofroi asistencë mjekësore banorëve të fshatit Binqë

/2L ONLINE/ – Në kuadër të vizitave mjekësore që po iu bëhen qytetarëve nëpër lokalitetet e tyre, sa herë që ata kërkojnë asistencë, një ekip i Qendrës Kryesore të Mjekësisë Familjare, së bashku me drejtorin e Drejtorisë së Shëndetësisë dhe Mirëqenies Sociale në Viti Basri Aliu dhe i përbërë nga mjek dhe infermier, ka kryer kontrolle mjekësore nëpër shtëpi në fshatin Binqë, ku jetojnë qytetarë të komunitetit shqiptar, serb e kroat.

Me këtë rast, drejtori Aliu u njoh më për së afërmi si me gjendjen shëndetësore të këtyre qytetarëve, po ashtu edhe me atë ekonomike dhe problemet me të cilat po ballafaqohen ata. Ai u ka premtuar këtyre banorëve që do të jenë në shërbim të ofrimit të shërbimeve mjekësore nëpër shtëpitë e këtyre banorëve, sa herë që ata kanë nevojë. Interesimi I qytetarëve për asistencë mjekësore ishte tejet i madh, ndërkohë që u kryen kontrolle edhe për pacient me aftësi të kufizuara. /2L ONLINE/