Një delegacion i UKZ-së po qëndron në vizitë zyrtare në ShBA

Rektori i Universitetit Publik “Kadri Zeka” në Gjilan, Prof. Asoc. Dr. Artan Dërmaku, së bashku me Prorektorin për Bashkëpunim Ndërkombëtar dhe Projekte, Prof. Dr. Dukagjin Leka, si dhe anëtaren e Këshillit Drejtues, Prof. Ass. Dr. Shejnaze Gagica, po zhvillojnë një vizitë zyrtare në Shtetet e Bashkuara të Amerikës.

Gjatë kësaj vizite, përfaqësuesit e UKZ-së po marrin pjesë në Konferencën vjetore të Agjencisë Amerikane për Akreditim, që po mbahet nga New Jersey deri në Tennessee.

Në këtë kuadër, UKZ po shqyrton mundësinë që programet e përbashkëta me partnerë evropianë, si dhe një program të nivelit PhD, t’i akreditojë në këtë institucion të njohur ndërkombëtarisht, duke rritur kështu standardet akademike dhe ndërkombëtarizimin e universitetit.

Përveç pjesëmarrjes në konferencë, delegacioni i UKZ-së ka zhvilluar takime me përfaqësues të kompanive amerikane, ku është diskutuar mundësia e ofrimit të praktikave profesionale me pagesë për studentët, veçanërisht për ata nga fusha e Shkencave Kompjuterike.

Vizita pritet të vazhdojë edhe në ditët në vijim, me takime të tjera të rëndësishme që do të kontribuojnë në zhvillimin dhe ndërkombëtarizimin e mëtejshëm të UKZ-së.

Universiteti Publik “Kadri Zeka” po vazhdon të konsolidojë pozitën e tij si një institucion i suksesshëm dhe i njohur ndërkombëtarisht, duke përfaqësuar me dinjitet arsimin e lartë publik të Kosovës edhe në arenën akademike amerikane. /2LONLINE/