Nisin punimet për zgjerimin dhe rregullimin e rrugës bujqësore në Zhegër

Kanë filluar punimet për rregullimin dhe zgjerimin e rrugës bujqësore në Zhegër të Gjilanit, me qëllim të përmirësimit të qasjes së fermerëve në tokat e tyre bujqësore dhe lehtësimit të punëve në këtë zonë.

Lajmin e ka bërë të ditur Qahil Halili, kryetar i Këshillit të Fshatit Zhegër, sipas të cilit ky investim po realizohet nga Drejtoria për Bujqësi dhe Pylltari e Komunës së Gjilanit, ndërsa punëkryese është kompania Zuka-Kompani.

Punimet përfshijnë rregullimin dhe zgjerimin e trasesë së rrugës në zonën bujqësore, si dhe hapjen e kanalit për trajtimin dhe largimin e ujërave atmosferike. Zgjerimi i rrugës po bëhet në përputhje me pikat kadastrale, me synimin që fermerëve t’u mundësohet qasje më e lehtë në pronat dhe tokat e tyre bujqësore.

Halili ka theksuar rëndësinë e këtij investimi për fermerët e Zhegrës dhe përmirësimin e kushteve për zhvillimin e veprimtarisë bujqësore.

„Ky investim është në shërbim të fermerëve dhe nevojave të tyre. Rregullimi dhe zgjerimi i rrugës do të lehtësojë qasjen në tokat bujqësore, ndërsa hapja e kanalit do të ndihmojë në trajtimin dhe largimin e ujërave atmosferike“, thuhet në njoftimin e kryetarit të Këshillit të Fshatit Zhegër.  /2LONLINE/