Nis ndërtimi i kampusit të shkollave të mesme në Gjilan

/2L ONLINE/ – Komuna e Gjilanit ka nisur sot ndërtimin e kampusit të shkollave të mesme, projekt ky i cili implementohet përmes partneritetit publiko-privat. Në nisjen e punimeve të ndërtimit të kampusit, ka marrë pjesë kryetari i Gjilanit, Lutfi Haziri, me bashkëpunëtorët e tij dhe përfaqësuesit e kompanisë gjilanase që e ka fituar kontratën.

Kryetari Haziri tha se ndërtimi i kampusit ndikon në ngritjen e cilësisë në arsim, ngritjen e sigurisë për nxënësit dhe ndikon në zhvillimin ekonomik lokal.

“Me anë të kampusit, krijohen kushte më të mira për nxënësit, do të të ketë ndikim edhe në cilësinë e arsimit dhe ajo që është e rëndësishme është që do të funksionoj në mënyrën më të mirë trekëndëshi nxënës-mësimdhënës-përindër. Po ashtu, kampusi ndikon edhe në zhvillimin ekonomik lokal”, ka thënë me këtë rast kryetari Komunës, Lutfi Haziri.

Haziri tha se me realizimin e këtij projekti, Komuna dëshmon se është e interesuar që të kemi zhvillim të arsimit, sikurse që do të krijohen hapësira të reja sportive, vende rekreative, garave të ndryshme, duke ndikuar në shëndetin e nxënësve dhe duke u larguar nga rrugët devijante.

Kreu i Gjilanit ka kërkuar nga qeveria e Kosovës që të nis procedurat për ndërtimin e kampusit universitar, në mënyrë që të lirohen hapësirat e shkollave të mesme dhe kampusi të implementohet në plotni. ​/2L ONLINE/