Nga takimi me delegacionin e National Democratic Institute të SHBA-së

Kryetari i Lëvizjes Vetëvendosje, Albin Kurti, bashkë me drejtuesen e Sekretariatit të Gruas Aktiviste, Nazlie Bala, kanë pritur sot paradite në zyrat e Lëvizjes VEetëvendosje një delegacion të National Democratic Institute, (NDI) të SHBA-së, të kryesuar nga z.Alexander Chavarria përfaqësues në Kosovë së bashku me znj.Laura Nichols përfaqësuese për Jemenin, dhe znj.Mary Frank ish ambasadore e SHBA-së në Komisionin për Çështje të Grave të OKB-së.

Gjatë takimit u diskutua rreth përfshirjes së gruas në procesin zgjedhor e pjesëmarrjen në përfaqësimin politik në nivelin komunal dhe atë qendror. Po ashtu diskutimi vijoi dhe me çështjet e modelit të strukturës organizative, adresimin e çështjeve gjinore me theks për gratë dhe vajzat si dhe rolin e mediave, hapësirën mediatike për gratë. Temë e diskutimit qenë dhe aspekte të Alternativës Qeverisëse të Vetëvendosje-s ku trajtohen çështjet e të drejtave dhe planifikohen zgjidhjet në plane politike, ekonomike e sociale.

“Dy çështje të cilat e përcjellin gruan sot, janë format organizative në jetën politike dhe shoqërore. E para, duke prodhuar pabarazi me vet faktin e të qenit e ndarë brenda një subjekti politik, brenda forumeve e llojeve te tilla te organizmit, dhe e dyta, patriarkalizmi që e përcjellë me dekada në familje dhe në shoqëri duke thelluar hendekun e ndarjes dhe pabarazisë” tha Nazlie Bala.

Ndërkaq, Albin Kurti tha se në VETËVENDOSJE! nuk e shohim gruan si përqindje dhe nuk besojmë që përfaqësimi i saj duhet të jetë formal.

Në zgjedhjet lokale ne i patëm tri gra kandidate për kryetare komunash, në lista zgjedhore kishim kandidate gra më shumë se sa kuota e vendosur formalisht e ligjërisht, qoftë në për nivelin lokal dhe atë qendror, si dhe Alternativa Qeverisëse e përgjithshme dhe ato lokale u hartuan me vëmendjen ndaj probleme të grave dhe vajzave dhe u prezantuan e u mbështetën nga të gjithë kandidatët tanë, ka thënë Kurti.