Nga sot një zyrtar policor vendoset në Qendrën për Punë Sociale në Gjilan
“Nga sot, në objektin e Qendrës për Punë Sociale në Gjilan është vendosur një zyrtar policor nga Policia e Kosovës. Ky hap synon rritjen e sigurisë në objekt, mbrojtjen e punonjësve gjatë ushtrimit të detyrave të tyre, si dhe vendosjen e rendit dhe rregullit në institucion”, ka bërë me dije Mimoza Kadriu Qerimi drejtoreshë e Drejtorisë për Shëndetësi dhe Mirëqenie Sociale, në Komunën e Gjilanit.
Sipas saj, duke pasur parasysh natyrën e ndjeshme të rasteve që trajtohen në QPS, është e domosdoshme të krijohet një ambient i sigurt, i qetë dhe me kushte të përshtatshme për punëtorët dhe qytetarët që marrin shërbime.
Drejtoresha e DSHMS-së ka thënë se siguria e punonjësve, respektimi i rregullave dhe funksionimi i rregullt i institucionit janë përgjegjësi që kërkojnë veprime konkrete.
“Drejtoria e Shëndetësisë dhe Mirëqenies Sociale mbetet e përkushtuar në fuqizimin e QPS-së, përmirësimin e kushteve të punës dhe ngritjen e cilësisë së shërbimeve sociale për qytetarët”, ka thënë drejtoresha Mimoza Kadriu Qerimi. /2LONLINE/
