Nga reshjet e fundit të shiut rrezikohet familja dhjetë anëtarëshe

(2L ONLINE) – Nënkryetari i Komunës së Gjilanit Rexhep Kadriu, së bashku me zyrtarët e drejtorisë për Mbrojtje dhe Shpëtim, kanë vizituar sot një familje në fshatin Dobërçan, tek kryefamiljari Fehmi Halili, familja dhjetë anëtarëshe e të cilit është rrezikuar nga rrëshqitja e dheut si pasoj e reshjeve të fundit.

Me këtë rast nënkryetari Kadriu, ka thënë se janë marrë të gjitha masat e nevojshme dhe tanimë familja është evakuuar dhe akomoduar në një vend të sigurt.

“Menjëherë kemi marrë masat e nevojshme për evakuimin e kësaj familje dhe ajo tashmë është akomoduar përkohësisht në objekt tjetër të sigurt. Është fjala për familjen dhjetë anëtarëshe të Fehmi Halilit nga fshati Dobërçan shtëpia e të cilit është rrezikuar nga shembja e masës shumë të madhe të dheut nga kodra të cilën e kishte afër, si pasoj e reshjeve të mëdha të shiut. Menjëherë është thirrur kompania e kontraktuar nga Komuna e Gjilanit për të bërë pastrimin e dheut në mënyrë që t’i mundësohet kësaj familjeje kthimi në shtëpi. Kjo shtëpi është vlerësuar se ishte në nivelin e rrezikshmërisë së lart nga zyrtarët komunal”, ka thënë nënkryetari Kadriu, duke shtuar se Komuna e Gjilanit është në shërbim dhe mbrojtje të qytetarëve të saj.

Ndryshe rrëshqitja e dheut afër kësaj shtëpie kishte ndodhur natën mes 3 dhe 4 shkurtit. /2L ONLINE/