Nevzati: Gjilani tashmë do të jetë përjetësisht me emrin tuaj – me emrin e presidentit të Shqipërisë!
Fjala e Bujar Nevzatit nga PDK-ja e Gjilanit, mbajtur sot me rastin e shpalljes “Qytetar Nderi” i Gjilanit, të Presidentit të Shqipërisë, Bajram Begaj.
***
I nderuari president Bajram Begaj!
Të nderuar të pranishëm!
Zonja dhe zotrinj!
Jam shumë lumtur sot,që kam nderin t’ju përshendes dhe dëshiroj mirëseardhje në emër të grupit të këshilltarëve të PDK-së dega në Gjilan!
Është nder të të kemi sot mes nesh, siç është nder për Gjilanin dhe gjithë qytetarët që tani e tutje të të kemi Qytetar Nderi.
Zoti president i Shqipërisë!
Nuk themi asgjë të re nëse rikujtojmë sot se të gjithë ne brezat pak më të vjetër jemi rritur me “andrrën për Shqipninë”, dhe një pjesë të kësaj ëndrre ne e kemi bërë realitet, me përpjekjet e luftën tonë për gati një shekull; në veçanti me luftën e jashtëzakonshme të Ushtrisë Çlirimtare të Kosovës, po patjetër edhe me ndihmën e jashtëzakonshme të Shqipërisë tonë!
Sot, kur të kemi këtu, z. President Begaj, ne ndjejmë se e kemi një copëz Shqipëri dhe Gjilani tani e tutje do ta ketë një copëz Shqipëri! Sigurisht, jemi shumë të lumtur e mirënjohës që e tashmja jonë na e ka mundësuar të jemi kështu të bashkuar, duke kujtuar gjithmonë ata që u sakrifikuan për këtë bashkim.
Sigurisht, jemi të vetëdijshëm se duhen bërë hapa të tjerë të mençur drejt bashkimit tonë, si e drejtë e domosdoshme e shqiptarëve, edhe për ata që u flijuan për këtë ideal – për idealin e bashkimit!
Zoti president më lejoni që me këtë rast ,të ju falenderoj për kujdesin e madhe që po e bën shteti shqiptar nën udhëheqjen tuaj, për mbrojtjen e luftës së drejt të krerëve të UÇK-së: Presidentit Hashim Thaçi, Kryetarëve Kadri Veseli e Jakup Krasniqi si dhe Deputetit Rexhep Selimi e bashkëluftëtareve të tyre, të cilët jemi të bindur se do të dalin fitimtarë.
Ashtu sikur e kanë fituar luftën e UÇK-së, së bashku me aleatët tanë në krye me SHBA-në.
Zoti president!
Mirënjohje e falënderim që ke pranuar të jesh pjesë e jona! Gjilani tashmë do të jetë përjetësisht me emrin tuaj – me emrin e presidentit të Shqipërisë! Qoftë e përjetshme Shqipëri e Kosova, e qoftë e afërt dita e bashkimit kombëtarë!
Gëzuar! Faleminderit!